Aýa raıy
Astana -10 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Ózbekstanda 2 myńnan astam memlekettik kásiporyn jedeldetilgen túrde jekeshelendiriledi

2020 jyldyń 29 qazan 2020 01:23

TAShKENT. ÓzA – QazAqparat – 28 qazan kúni Ózbekstan Prezıdentiniń tóraǵalyǵymen memlekettik kásiporyndardy reformalaý jáne Prezıdent jarlyǵyna sáıkes memlekettik aktıvterdi jekeshelendirý máseleleri boıynsha vıdeoselektorlyq keńes ótti. «QazAqparat» HAA bul týraly ÓzA-ǵa silteme jasap habarlaıdy.

Ózbekstan Prezıdenti Shavkat Mırzıeev 27 qazan kúni memlekettik aktıvterdi jedeldetilgen túrde jekeshelendirý boıynsha jarlyqqa qol qoıdy.

Jarlyqta kórsetilgen sharalarmen 2 myńnan astam memlekettik aktıv qamtylady. Olardyń ishinde 479 kásiporyn men 15 jyljymaıtyn múlik nysanyn saýda-sattyqqa shyǵarý kózdelgen. 62 kásiporyn jekeshelendirýge daıyndalady. 32 kásiporyn men sala transformatsııalansa, 507 bazardyń qyzmeti jetildiriletin bolady.

Onymen qosa, buǵan deıingi aktilerde kórsetilgen 386 nysan, sondaı-aq hokımder iske asyrýǵa quzyretti 559 nysan saýda-sattyqqa shyǵarylady.

«Kýkon neftgaz parmalash ıshları» jáne «Horazmsývkýrılısh» syndy 62 iri kásiporyndy jekeshelendirý máselesinde, olardyń ınvestıtsııalyq tartymdylyǵyn arttyrý mańyzdylyǵy atap ótildi.

Sondaı-aq memlekettik jobalaý ınstıtýttaryn transformatsııalaý máselesi qozǵaldy. Elde iri qurylys kompanııalarynyń sany artyp keledi. Qurylys kompanııalary men memlekettik jobalaý ınstıtýttarynyń tyǵyz kooperatsııasy esebinen jobalardyń sapasy men basqarý júıesin jaqsartý mindeti qoıyldy. Jańa júıe eń aldymen, 6 jobalaý ınstıtýtynda engiziletin bolady. Keıinnen jobalaý ınstıtýttaryndaǵy memlekettiń qatysýy qurylystaǵy seriktes-uıymdarda iske asyrylmaq.

Budan bólek, keńes barysynda 500-den astam bazar men saýda keshenderine memlekettiń qatysýyn túbegeıli qaıta qaraý qajettigi aıtyldy. Bul úshin ınvestorlar arasynda konkýrs jarııalanady. Eger bazar tabysy ósip, salyqtyq túsimder men jumys oryndarynyń sany turaqty túrde artatyn bolsa, onda kásipker memlekettik úlesti bólip tóleý shartymen satyp ala alady.


Avtor Mıra Tólendiqyzy
Basty sózder: Álem, Ózbekstan,
Joǵary qaraı