Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Ózbekstan-Qazaqstan arasyndaǵy taýar aınalymy jyl basynan beri $1 mlrd asty - Premer

2022 jyldyń 16 mamyr 2022 21:37

NUR-SULTAN. QazAqparat - Qazaqstan Premer-Mınıstri Álıhan Smaıylov beınekonferentsııa baılanysy rejıminde Ózbekstan Premer-Mınıstri Abdýlla Arıpovpen kelissóz júrgizdi, dep habarlaıdy QazAqparat vedomstvonyń resmı saıtyna silteme jasap.

Úkimet basshylary keńeıtilgen quramda saýda-ekonomıkalyq yntymaqtastyqty odan ári damytý, ónerkásip, kólik, aýyl sharýashylyǵy jáne bilim berý salalaryndaǵy birlesken jobalardy iske asyrý barysy, sondaı-aq sý-energetıka salasyndaǵy ózara is-qımyl máselelerin talqylady.

«Ózbekstan – bizge baýyrlas ári kórshiles memleket, ýaqyt synynan ótken dosymyz jáne uzaq merzimdi strategııalyq seriktesimiz. Bizdiń negizgi maqsatymyz – eki eldiń Memleket basshylary alǵa qoıǵan mindetterdi tolyq júzege asyrý jáne Qazaqstan-Ózbekstan yntymaqtastyǵyn jańa sapaly deńgeıge kóterý», — dedi Álıhan Smaıylov.

Sondaı-aq QR Premer-Mınıstri Jambyl oblysynda jol-kólik oqıǵasy saldarynan qaza tapqan Ózbekstan azamattarynyń týystary men jaqyndaryna kóńil aıtyp, qoldaý bildirdi.

Óz kezeginde Abdýlla Arıpov zardap shekkenderge jedel kómek kórsetip, barlyq qajetti qoldaý sharalaryn uıymdastyrǵany úshin Qazaqstandaǵy áriptesterine alǵysyn bildirdi.

Kelissóz barysynda 2021 jyldyń qorytyndysy boıynsha eki el arasyndaǵy saýda-sattyq 33%-ǵa ($4,3 mlrd) óskeni atap ótildi. 2022 jyldyń І toqsanynyń qorytyndysy boıynsha da oń dınamıka baıqalady — taýar aınalymy $1 mlrd asty, bul ótken jyldyń sáıkes kezeńindegi kórsetkishten 27,2%-ǵa joǵary. Ekijaqty taýar aınalymyn $10 mlrd deıin jetkizý úshin aldaǵy bes jylǵa 41 is-sharadan turatyn Praktıkalyq is-qımyl jospary qabyldandy. Bul baǵytta taraptar ózara saýdadaǵy kedergilerdi joıyp, jańa kedergilerdiń aldyn alý qajettiligin atap kórsetti.

Qazaqstan tıisti Jol kartasynyń jobasyn ázirlep jatyr. Atalǵan qujat týyndaǵan túıindi máselelerdi sheshý maqsatynda naqty jumys júrgizýge múmkindik beredi.

Ónerkásip kooperatsııasynda da oń úrdis baıqalady, onda qazirgi ýaqytta jalpy somasy shamamen $1 mlrd 786 mln bolatyn toǵyz iri birlesken joba iske asyrylyp jatyr.




«Ózbek kompanııalarymen tyǵyz yntymaqtastyq ornatýǵa qýana kelisemiz», — dedi Álıhan Smaıylov.

Aýyl sharýashylyǵy salasyndaǵy yntymaqtastyq turǵysynan qazaqstandyq kompanııalardyń Ózbekstanǵa et-sút ónimderin, balyq jáne odan jasalatyn ónimderdi eksporttaýǵa múddeli ekeni aıtyldy.

Buǵan deıin Ózbekstan tarapyna el aýmaǵyna aýyl sharýashylyǵy ónimderin ákelýge quqyǵy bar kompanııalardyń tizilimine 113 qazaqstandyq kompanııany engizý boıynsha barlyq qajetti materıaldar jiberilgen bolatyn. Azyq-túlik ınflıatsııasyn tejeý aıasynda Qazaqstan men Ózbekstannyń taýar ótkizý júıelerin úılestirýdi jandandyrý qajet ekeni atap ótildi.

Sondaı-aq Úkimet basshylary eki eldiń joǵary oqý oryndary arasyndaǵy áriptestikti retke keltirý máselelerin talqylady. Ózbekstan jastarynyń qazaqstandyq bilimge degen turaqty qyzyǵýshylyǵyn eskere otyryp, Tashkentte Ál-Farabı atyndaǵy QazUÝ, L. N. Gýmılev atyndaǵy EUÝ men M. Áýezov atyndaǵy Ońtústik Qazaqstan ýnıversıtetiniń fılıaldaryn ashý máselesi pysyqtalyp jatyr.

Sonymen qatar kelissóz barysynda sý-energetıka salasyndaǵy ózara is-qımyl máselesi qozǵaldy. Taıaýda vegetatsııalyq kezeńde «Bahrı Tochık» sý qoımasynyń jumys rejımi boıynsha úsh jaqty ýaǵdalastyqqa qol jetkizý kózdelip otyr, bul Syrdarııa ózeniniń orta aǵysyn, onyń ishinde «Dostyq» kanalynyń qazaqstandyq bóligin qajetti sýmen qamtamasyz etýge múmkindik beredi.

Talqylaýdy qorytyndylaı kele, Qazaqstan men Ózbekstannyń Premer-Mınıstrleri birlesken kúsh-jigermen keshendi ekijaqty yntymaqtastyqqa qosymsha serpin berý úshin belgilengen barlyq jobalardy pysyqtaýdy odan ári jalǵastyrýǵa daıyn ekenderin rastady.


Basty sózder: Saýda, Ózbekstan, QR Úkimeti,
Joǵary qaraı