Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Otandyq kólik operatorlarynyń úlesin arttyrýǵa arnalǵan qujat qabyldandy

2021 jyldyń 21 qańtar 2021 10:42

NUR-SULTAN. QazAqparat – Parlament Senatynyń jalpy otyrysynda «2007 jylǵy 6 naýryzdaǵy Qazaqstan Respýblıkasynyń Úkimeti men Grýzııa Úkimeti arasyndaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Atalǵan Hattama ekijaqty jáne tranzıttik, sondaı-aq úshinshi elge/elderden avtokólikpen júk tasymaldaýǵa ruqsat júıesin engizýdi kózdeıdi.

«Qazirgi kezde eki el arasynda qaýipti júkter men aýyr salmaqty júkterdi qospaǵanda, avtokólikpen ekijaqty, tranzıtti jáne úshinshi elderge júk tasymaldaý ruqsatsyz negizde júzege asyrylady. Ruqsatsyz júıe avtomobıl tasymalyn oryndaý kezinde Grýzııanyń kólik operatorlaryna basymdyq berip, ulttyq tasymaldaýshylardyń múddesin tolyqtaı qorǵaýǵa múmkindik bermeıdi. Atap aıtqanda, 2020 jyly eksport-ımport baǵytynda tasymaldanǵan 18 myń 96 tonna júktiń 29 paıyzy otandyq tasymaldaýshylar enshisine kelse, 57 paıyzyn grýzın kólik operatorlary tasymaldady», - dedi Indýstrııa jáne ınfraqurylymdyq damý mınıstri Beıbit Atamqulov.


Osyndaı jaǵdaıdyń basty sebepteri:

- Grýzııada halyqaralyq tasymaldaǵy avtokólik parki artqan. Elimiz parki 7 myń 754 bolsa, Grýzııada 8 myń 901-ge jetti;

- sońǵy kezderi Grýzııa aýmaǵynda Grýzııa-Túrkııa, Grýzııa-Ýkraına sııaqty birlesken avtotasymal kásiporyndary ashyldy;

- Grýzııa eliniń teńizge shyǵýǵa múmkindigi bar.

«Sondyqtan ruqsat júıesin engizý eki el arasyndaǵy avtokólikpen júk tasymal naryǵynda tepe-teńdikti ornatýǵa múmkindik beredi. Ekinshiden, otandyq kólik operatorlarynyń tasymaldaǵy úlesin arttyrýǵa yqpal etedi. Úshinshiden, otandyq tasymaldaýshylar tasıtyn júk kólemi ulǵaıyp, olardyń tabysy artady. Atalǵan Hattamany ratıfıkatsııalaý bıýdjet qarajatyn jumsaýdy qajet etpeıdi», - dedi mınıstr.


Avtor Rýslan Ǵabbasov
Basty sózder: Ekonomıka, Senat, Zań, Parlament,
Joǵary qaraı