Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Óskemenniń úzdik muǵalimi: Qazirgi zaman pedagogi únemi izdeniste bolýy kerek

2021 jyldyń 2 qazan 2021 22:08

ÓSKEMEN. QazAqparat – Óskemen qalasyndaǵy S.Nurmaǵambetov atyndaǵy №4 orta mektepte ınformatıka pániniń muǵalimi bolyp eńbek etetin Olga Gataýllına bıylǵy «Úzdik pedagog» baıqaýynda oza shapqandardyń biri. Árkez shákirtteriniń kóńil-kúıin baǵyp, nazarlaryn sabaqqa baıyppen aýdarýǵa tyrysatyn pedagogtyń 30 oqýshysy túrli dodalarda júldeli oryndardy ıelengen. QazAqparat tilshisi Ustazdar kúnine oraı Olga Gataýllınamen suhbat qurdy.

- Muǵalimdik jolǵa qalaı keldińiz?

- 1965 jyly Óskemende jaryq dúnıe esigin ashtym. Eki joǵary bilimim bar. Onyń biri tehnıkalyq, ekinshisi pedagogıkalyq. 1998 jyldan beri ustazdyq etip kelemin. Informatıka - bul aqparat jáne ony óńdeý ádisteri týraly ǵylym. Oqýshylardy Facebook, WhatsApp jelilerinde taraıtyn jalǵan aqparattarǵa senbeýge, Blockchain syndy vırtýaldy qarjylyq pıramıdalarynyń qarmaǵyna ilinbeýge, iPhone, iPad nemese iPod, iOS nemese mac OS-ty ajyrata bilýge úıretemiz.

Osy 23 jyldyq eńbek ótilimde túrli deńgeıdegi pedagogıkalyq sheberliktiń on eki saıysyna qatysyp, alty ret 1 oryn, bir ret 2 oryn, tórt ret 3 oryn ıelendim. «Qashyqtan oqytý tásilderi men quraldary» kýrsynyń sertıfıkattalǵan treneri bolyp, Moodle qashyqtan bilim berý tehnologııasy tıýtorynyń kýáligin aldym.




- Osy pánge qatysty qandaı avtorlyq baǵdarlamalaryńyz bar?

- Qazirgi ýaqytta sátti qoldanylyp júrgen eki baǵdarlama avtorymyn. Olardyń biri

«Baǵdarlamalaý, 3D-modeldeý, robototehnıka» Qazpatenttiń 2019 jylǵy avtorlyq kýáligimen rastalǵan. ShQO ákimi Danıal Ahmetovtyń hattamalyq tapsyrmasy boıynsha jasalǵan ekinshi baǵdarlamam «jalpy bilim beretin orta mektepte obektili-baǵyttalǵan baǵdarlamalaý» dep atalady. Osy jumysym 2020 jyly «Úzdik avtorlyq baǵdarlama» respýblıkalyq konkýrsynda I orynǵa ıe boldy. Sondaı-aq byltyr «Qashyqtan oqytýdyń tásilderi men quraldary» biliktilikti arttyrý kýrstary baǵdarlamasyn qurý boıynsha avtorlyq ujymnyń quramyna kirdim. Osy arqyly ózim 80 muǵalimdi oqyttym.




- Bıik belesterdi baǵyndyrǵan shákirtterińiz jaıly aıtyp ótseńiz.

- 30 oqýshym túrli deńgeıdegi olımpıadalar men ǵylymı jobalardyń júldegerleri atanǵan. 11 synyp oqýshysy Nadejda Zakýsılova 2019 jyly oblystyq IT-forýmda úzdik áleýmettik joba úshin S.Amanjolova atyndaǵy ShQÝ rektorynyń grantyn utyp aldy. Taǵy bir shákirtim Davıd Borozınts 2021 jyly baǵdarlamalaý boıynsha oblystyq Hakatonnyń gran-prıin jeńip aldy. Úsh oqýshym jolymdy qýyp, ınformatıka pániniń muǵalimi bolyp eńbek etýde.




- Jaqsy ustazdyń boıynda qandaı qasıet bolý kerek dep oılaısyz?

- Qazirgi zaman pedagogy únemi izdeniste bolýy kerek. Sebebi kún saıyn jańashyldyqtar, túrli ózgerister bolyp jatady. Muǵalimniń sonyń bárinen habardar bolyp otyrýy shart. Bizdiń mektep dırektory ylǵı da «balaǵa qandaı da bir baǵa qoımas buryn onyń búgin ne iship, qaıda uıyqtaǵany jaıly oılanyńdar» deıdi. Bul sózdiń jany bar. Ustaz árkez ózin oqýshynyń ornyna qoıyp kórýi tıis. Sebebi turmysy tómen otbasydan shyqqan, januıasy tolyq emes balalar bolady. Sol úshin men ár shákirtimniń kóńil-kúıin baǵyp, qas-qabaǵyn ańdyp otyramyn. Retin taýyp, nazaryn sabaqqa aýdarýǵa tyrysamyn.

- Áńgimeńizge kóp rahmet!


Joǵary qaraı