Aýa raıy
Astana 12 °S
Almaty 26 °S
valıýta baǵamy
USD 412.55
EUR 468.66
RUB 5.79
CNY 58.80

Orynbek Joldybaıdyń «Joldas bolsań jaqsymen...» atty jańa kitaby jaryq kórdi

2020 jyldyń 3 tamyz 2020 10:46

NUR-SULTAN. QazAqparat –Elordadaǵy «Folıant» baspasynan jýrnalıst, aýdarmashy, fılologııa ǵylymdarynyń kandıdaty, QR mádenıet qaıratkeri, Qazaqstan Jazýshylar jáne Jýrnalıster odaǵynyń múshesi Orynbek Joldybaıdyń «Joldas bolsań jaqsymen...» atty jańa kitaby jaryq kórdi, dep habarlaıdy QazAqparat.

Kólemi 33 baspa tabaqty quraıtyn, 525 betten turatyn qomaqty kitap bes bólimnen turady. Atap aıtqanda, elimizdiń tanymal tulǵalary, memleket jáne qoǵam qaıratkerleri, ǵalymdar men ádebıetshiler týraly jazǵan tolymdy maqalalary «Kelbet» degen ataýmen toptastyrylǵan. Al «Sáti túsken suhbat» aıdarynda belgili azamattarmen júrgizgen suhbattary berilip otyr. Zamandastarynyń oqyrmandarǵa usynǵan jańa kitaptary jóninde jazǵan oı-tolǵamdary «Janazyq» taqyryby boıynsha biriktirilgen. El aǵalarynyń, áriptesteri men dostarynyń jáne aǵaıyn-týystarynyń jaqsylyqtaryna oraı júrekten shyqqan jyrlary «Arnaýlar» bóliminiń arqaýyna aınalǵan. Orynbek Endibaıulynyń ózi jáne onyń shyǵarmashylyq jetistikteri jaıly jazǵan qalamgerler de az emes. Osy baǵyttaǵy oı-pikirler «Dostar lebizi» atty bólimde jarııalanǵan.

Avtor óz maqalalarynda qoǵamdaǵy kókeıkesti máselelerdi qozǵaıdy. Suhbattasqan adamynyń kisilik kelbetin, adamı qasıetterin, júregindegi syrlaryn asha biledi. Al áriptesteri Orynbek Endibaıulynyń eńbekqorlyǵyn, adaldyǵyn joǵary baǵalaıdy.

Bul kitaptyń oqyrman úshin qundylyǵy – onyń shynaıylyǵynda, qalamgerdiń jýrnalıstik qyzmetke degen adaldyǵynda. Kitaptyń ataýy aıtyp turǵandaı, «Joldas bolsań jaqsymen», óziń de elge syıly bolasyń, ómiriń ónegeli, tóńiregiń berekeli bolatyny sózsiz. Jan-dúnıesi rýhanı baı adamnyń qoǵamǵa da, halyqqa da paıdasy mol. Avtor qalam tartqan memleket qaıratkerleriniń ómir jáne eńbek joly, parasatty oı-tolǵamdary jas urpaqqa úlgi-ónege bolady dep oılaımyz.

Aıta ketý kerek, Orynbek Joldybaı 1949 jyly Túrkistan oblysynyń Aysaı kentinde dúnıege kelgen. Ol – Ál-Farabı atyndaǵy Qazaq memlekettik ýnıversıtetiniń túlegi. Qazaq televızııasynda, «Aqıqat» jýrnalynda eńbek etti. Keıin memlekettik qyzmetke aýysyp, Prezıdent Ákimshiligi men Mınıstrler Kabınetiniń apparatynda, Parlament Senatynyń apparatynda jaýapty qyzmetter atqardy. Qazir zeınetkerlik demalysta.

Qalamgerdiń «Zamana kelbeti» (2004), «Ýaqyt lebi» (2005), «Ótken jyldar órnegi» (2009), «Jan syrym» (2009), «Akademık R. Berdibaı zertteýlerindegi túrikshildik saryndary» (2010) atty eńbekteri jaryq kórdi. Ol qazaqtyń XIX ǵasyrdaǵy halyq aýyz ádebıetiniń kórnekti ókilderiniń biri Qulynshaq Kemelulynyń el aýzynda júrgen shyǵarmalaryn jınaqtap, qurastyrdy jáne kitap túrli baspalardan tórt márte jaryq kórdi. Sondaı-aq memleket jáne qoǵam qaıratkeri, Aýyl sharýashylyǵy ǵylymdary akademııasynyń akademıgi, ekonomıka ǵylymdarynyń doktory Qýanysh Aıtahanov týraly «Azamat ajary» atty kitapty qurastyryp, jaryqqa shyǵardy.


Basty sózder: Ádebıet,
Joǵary qaraı