Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ordabasydan Mańǵystaýǵa 4 vagon mal azyǵy jóneltildi

2021 jyldyń 22 shilde 2021 06:11

ORDABASY. QazAqparat - Túrkistan oblysy Ordabasy aýdany Badam stansasynan Mańǵystaý oblysyna 5 myń baý, ıaǵnı, 110 tonna shóp tıelgen 4 vagon shóp jiberildi, dep habarlaıdy QazAqparat.

Bul ıgi is-shara «Nur Otan» partııasy Túrkistan oblystyq fılıalynyń úılestirýimen, Ordabasy aýdany ákimdiginiń uıymdastyrýymen ótkizildi.

Batystaǵy qýańshylyq búkil eldi alańdatty. Onyń ishinde Túrkistan oblysynyń turǵyndary da shama kelgenshe áreket etip, kómegin joldap jatyr.

Bul rette otanshyl jas Qurmet Talapqazynyń bastamasy qoǵamǵa qozǵaý salǵanyn aıta ketken jón.

Túrkistan oblysynyń ákimi Ó.Shókeevtiń atsalysýymen «Qazaqstan temir joly» ulttyq kompanııasy» aktsıonerlik qoǵamymen kelisim jasalyp, logıstıka máselesi sheshilgeni belgili.

«Nur Otan» partııasynyń Túrkistan oblystyq fılıaly da atalǵan aktsıonerlik qoǵamyna hat joldap, qoldaýyna ıe boldy.

Aýmaqtaǵy fılıaldar ıgi iske jumyldyryldy. Osy arqyly Ordabasy aýdanynyń janashyr azamattary, belsendi turǵyndary usynǵan kómek Mańǵystaý oblysyna jiberilip otyr.

«Nur Otan» partııasy Ordabasy aýdandyq fılıaly tóraǵasynyń birinshi orynbasary Alıasqar Berdimurattyń aıtýynsha, Ordabasy aýdany ákimdigi men partııanyń jergilikti fılıaly jemshóp máselesin baqylaýǵa alǵan.

«Búgingi ıgi aktsııaǵa aýdan kólemindegi «Batsý vodokanal» JShS, «Ordabasy tas» JShS, sharýa qojalyqtary, aýdandyq máslıhat depýtattary, «Nur Otan» fraktsııasynyń músheleri, erikti azamattar, aýdan turǵyndary úles qosty. «Nur Otan» partııasynyń ózge aýdandardaǵy fraktsııa músheleri de óz aýyldarynda ıgi iske úles qosyp jatyr. Biz Mańǵystaý jurtymen birgemiz!», – deıdi Á.Berdimurat.

«Shóp jınaý úshin aýdan boıynsha 5 beket uıymdastyrylyp, 5 myń baýdan astam shóp jınaldy. Jalpy Ordabasy aýdanynda mal azyǵy jetkilikti deńgeıde. Biraq jyldaǵydaı bitik shóp bolmaýyna baılanysty aýdan ákimi Baǵlan Batyrshaevtyń bastamasymen árbir aýyl okrýgterinde mal azyǵyn jınaý beketteri ashyldy. Ol jerge jem-shóp qory jınalý ústinde. Ózen boıyndaǵy qamystar da orylýda. Osy qor arqyly qysta áleýmettik az qamtylǵan, mal azyǵyn jınaýǵa shamasy joq, er-azamattary joq otbasylarǵa jem-shóp beriledi. Aýdan ákimdigi qysqy naýqanǵa daıyndyqty bastap ketti», – deıdi Ordabasy aýdandyq aýyl sharýashylyǵy bóliminiń basshysy Ábilda Álibekov.

Shópti jınaýǵa jáne artýǵa aýdannyń eriktileri, belsendi azamattary, jasotandyqtar jáne ózge de otanshyl jandar kómek kórsetti.

Badam stansasynan joldanǵan mal azyǵy Mańǵystaý oblysynyń Shetpe, Quryq jáne Jetibaı stansalaryna jetkiziledi.

Ol jaqta kómekti kútip alyp, úlestiretin azamattar bekitilgen.








Joǵary qaraı