Oralda qyzdy zorlaǵan taksıst pen onyń tanysy 8 jylǵa sottaldy

ORAL. QazAqparat – Oralda jolaýshy qyzdy zorlaǵan taksı júrgizýshisi men onyń tanysy sottaldy, dep habarlaıdy QazAqparat tilshisi.

Oral qalalyq sotynyń baspasóz qyzmetinen málim etkenindeı, Q. jáne P. QR QK 120-baby 2-bóligine sáıkes (aldyn ala sóz baılasý arqyly adamdar toby jasaǵan zorlaý) aıypty dep tanyldy.

Olardyń árqaısysy 8 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Sotta anyqtalǵanyndaı, oqıǵa ótken jyly 8 tamyzǵa qaraǵan túni boldy. «Indraıver» qosymshasy boıynsha taksı shaqyrǵan 26 jastaǵy stýdent qyzǵa kelgen avtokólikte júrgizýshimen birge jolaýshy bolǵan. Júrgizýshi jolshybaı avtokólik esigin bekitip tastap, qyzdy qala syrtyna alyp shyǵyp, kezektesip zorlaǵan. Sosyn qus fabrıkasy aýdanyndaǵy úıge ákelip, zorlaýdy jalǵastyrǵan. Tańmen júrgizýshi qyzdy jaldap turatyn páterine ákelip tastaǵan.

Keıin qyz polıtsııaǵa júginip, 24 tamyzda kúdiktiler ustaldy. Olar Oral qalasynyń 31 jáne 29 jastaǵy turǵyndary bolyp shyqty. Ekeýi de úılengen, balalary bar.

Aıyptalýshylardyń kinálary jábirlenýshiniń, kýágerlerdiń sotqa bergen jaýaptarymen, oqıǵa ornyn qaraý kezindegi hattamamen, saraptama qorytyndylarymen dáleldendi.

Sot úkimi kúshine engen joq.