Aýa raıy
Astana -14 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Oralda aǵaıyndy úshem Otan aldyndaǵy áskerı boryshyn ótep júr

2020 jyldyń 17 qazan 2020 10:51

ORAL. QazAqparat - Oralda ornalasqan Ulttyq ulannyń «Batys» óńirlik qolbasshylyǵynyń 5517 áskerı bóliminde Aqtaýdan kelgen aǵaıyndy úshem merzimdi áskerı qyzmetin atqaryp júr. Bul jaıynda Ulttyq ulannyń «Batys» óńirlik qolbasshylyǵyna silteme jasap QazAqparat habarlaıdy.

18 jasar úshem Aqarys, Bekarys jáne Janarys Zekkenovter osy jyldyń kókteminde quqyqtyq tártip áskeriniń qataryna shaqyrylǵan.

Aǵaıyndy Zekkenovter dúnıe esigin ashqaly beri árqashan birge. «Bolashaq» akademııasynyń kolledjin «Sý kóligin paıdalaný» mamandyǵy boıynsha bitirgennen keıin balalardy merzimdi qyzmetke shaqyrǵan. Sol kezde de olar ajyratpaýdy ótingen. Oǵan jergilikti qorǵanys ister departamenti qol ushyn sozyp, bir áskerı bólimge jiberdi.

Úshem psıhologııalyq test tapsyrǵan kezde olardyń túr-álpeti bir-birine sáıkes keldi. Aǵaıyndylardyń ózderi buǵan úırenip qalǵan.

«Alaıda bir aıyrmashylyq bar: Aqarystyń boıy eki baýyrynan tórt santımetrge uzyn – 178 bolsa, Bekarys pen Janarystyń boıy - 174 santımetr. Alaıda bul aǵaıyndylardyń dene shynyqtyrýda birdeı nátıje kórsetýine kedergi keltirmeıdi. Olar áskerge daıyndalý barysynda arnaıy sportpen shuǵyldanyp, 100 m jáne 3 shaqyrymǵa júgirýde jáne bel temir tartylýda birdeı kórsetkish kórsetti. Úsheýi de sportpen aınalysady. Aqarys pen Bekarys toǵyz jasynan bastap «karate-do» sport sektsııasyna qatysqan. Sol ýaqyt ishinde aǵaıyndylar «karate-do» boıynsha oblystyq jáne qalalyq sport týrnırlerine qatysyp, birneshe ret júldeli oryndarǵa ıe boldy. Al Janarys sambo kúresinen sport sheberiniń kandıdaty atandy» dep málim etti «Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanov.

Aıta keteıik, 5517 áskerı bóliminde úshemniń áskerge shaqyrylý jaǵdaıy eshqashan bolmaǵan.

«Quqyq tártibi áskerinde qyzmet etkenimdi maqtan tutamyn. Sebebi, Ulttyq ulan qatarynda qyzmet etý, ómirde laıyqty ornyńdy tabýǵa kómektesetin barlyq zamanaýı jaǵdaılarǵa ıe bolý - el Prezıdentiniń jastarǵa qamqorlyǵynyń nátıjesi», - deıdi Bekarys Zekkenov.




«Ulttyq ulan áskerlerine merzimdi qyzmetke qazir shynymen de úzdik jastar keledi, - deıdi 5517 áskerı bólimi batalon komandıriniń tárbıe jáne áleýmettik-quqyqtyq jumystar jónindegi orynbasary, kapıtan Damır Jákenov. - Jaýapty, saýatty, rýhy men denesi myqty, moraldyq turǵydan shynyqqan. Óıtkeni, qysqa merzim ishinde biz olardy naǵyz Otan qorǵaýshy etip daıyndap shyǵarýymyz kerek. Meniń tájirıbemde aǵaıyndy úshemniń merzimdi áskerı qyzmet ótkerýi - birinshi jaǵdaı. Buǵan deıin tek egizderdi kórgenmin. Qazir aǵaıyndy úshem Oral qalasynda qoǵamdyq tártipti jáne qoǵamdyq qaýipsizdikti qorǵaý qyzmetin minsiz, abyroımen atqaryp keledi».

Otan aldyndaǵy áskerı boryshyn aıaqtaǵannan keıin aǵaıyndy Zekkenovter týǵan qalasy Aqtaýǵa oralady. Sodan keıin olar joǵary bilim alyp, zańger mamandyǵyn meńgerýdi, ishki ister organdaryna jumysqa ornalasýdy josparlap otyr.











Joǵary qaraı