Aýa raıy
Astana -7 °S
Almaty -13 °S
valıýta baǵamy
USD 421.58
EUR 496.83
RUB 5.53
CNY 62.20

Ońtústik Koreıa Qazaqstanǵa kezekti gýmanıtarlyq kómek jiberdi

2020 jyldyń 22 qazan 2020 22:56

NUR-SULTAN. QazAqparat – QR DSM Taýarlar men qyzmetterdiń sapasy men qaýipsizdigin baqylaý komıtetiniń Ulttyq saraptama ortalyǵyna COVID-19 pandemııasymen kúresý úshin Koreıa Respýblıkasynyń gýmanıtarlyq kómegi tabystaldy, dep habarlaıdy QazAqparat tilshisi.

Qazaqstandaǵy Ońtústik Koreıa elshiliginiń málimetine sáıkes, 19 qazan kúni Almaty qalasyna gýmanıtarlyq kómek túrinde 38 800 testileý júrgizýge jetetin ońtústikkoreıalyq PTR-test jınaqtary jetkizilgen. Bul tester Ulttyq saraptama ortalyǵynyń Nur-Sultan, Almaty qalalaryndaǵy jáne Túrkistan, Jambyl, Almaty jáne Shyǵys Qazaqstan oblystaryndaǵy fılıaldaryna jiberiledi.

«QR Úkimetiniń ýaqytyly qabyldaǵan sharalary men qazaqstandyqtardyń osy sharalardy oryndaýǵa kómegi arqasynda Qazaqstan COVID-19 pandemııasynyń birinshi tolqynyn eńsere aldy. Qazirgi ýaqytta birqatar elde COVID-19 taralý ahýaly nasharlap jatqanda, Qazaqstan pandemııanyń ekinshi tolqynyna saqtyqpen daıyndalýda. Koreıa Respýblıkasy úkimetiniń bul gýmanıtarlyq kómegi Qazaqstandy COVID-19 pandemııasynyń ekinshi tolqynyna daıyndaý protsesine úles qosady dep úmittenemin», - dedi Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ký Hong-sok.





Óz sózinde elshi gýmanıtarlyq kómek kórsetýden basqa, Koreıa men Qazaqstannyń pandemııamen kúres tájirıbesin almasý, densaýlyq saqtaýdyń tsıfrlyq ınfraqurylymyn qurý salasynda jáne ózge de baǵyttarda yntymaqtasyp otyrǵanyn atap ótti.

Sonymen birge, Ký Hong-sok Koreıa Respýblıkasynyń elshiligi tarapynan qarttar úıi, balalar úıi, mektepter men basqa da mekemeler úshin qaıtarymsyz negizde jeke qorǵanys quraldaryn berý aktsııalary únemi ótip turatynyn habarlady.

«Bizdi Koreıa Respýblıkasymen túrli baǵyttaǵy sonyń ishinde densaýlyq saqtaý salasyndaǵy burynnan kele jatqan dostyq-áriptestik qatynastar baılanystyrady. Pandemııanyń osyndaı kúrdeli kezeńindegi Koreı eliniń qoldaýyn erekshe baǵalaımyz jáne Ońtústik Koreıanyń joǵary basshylyǵyna COVID-19 Qazaqstan Respýblıkasy aýmaǵynda taralýyna qarsy kúres úshin kórsetken gýmanıtarlyq kómegi úshin alǵys bildirýge ruqsat etińiz. Bizdiń elderimiz arasyndaǵy dostyq qarym-qatynastarymyz jáne strategııalyq áriptestigimiz ózara túsinistik negizinde ǵana nyǵaıyp, damı beretinine senimdimin», - dedi QR Densaýlyq saqtaý birinshi vıtse-mınıstri Marat Shoranov.

Koreıa Respýblıkasy úkimetinen kelgen gýmanıtarlyq kómekten bólek, DDSU jahandyq jetkizý arnasy (WHO Global supply chain) arqyly satyp alynǵan 75 myń AQSh dollary bolatyn FFP2 standartyndaǵy qorǵanys maskalary jáne 300 myń AQSh dollary somasyndaǵy medıtsınalyq jabdyqtar túrinde gýmanıtarlyq kómektiń kelesi partııalary jetkiziledi.


Joǵary qaraı