Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Olımpıada oıyndaryna sholý: Qazaqstan týyn qandaı sportshylar alyp shyqty

2021 jyldyń 23 shilde 2021 13:28

NUR-SULTAN. QazAqparat – Búgin Nur-Sultan ýaqytymen 17:00 de Tokıo qalasyndaǵy XXXII jazǵy Olımpıadanyń ashylý saltanaty ótedi. Saltanatty sherýde álemniń 200 elinen kelgen 11 myńǵa tarta sportshy júrip ótedi jáne qurama arasynda bir sportshyny eldiń týymen shyǵarý dástúri bar. Bul da sportshyǵa artylǵan jaýapkershilikti eseleı túsetindeı kórinedi. Ár jyldary Qazaqstan týyn túrli baǵyttaǵy sportshylar kóterip shyqty. QazAqparat agenttigi Qazaqstan týyn kóterip shyqqan ulandardyń Olımpıada nátıjelerine sholý usynady.




Qazaqstannyń táýelsiz el retinde qatysqan alǵashqy jazǵy Olımpıadasy 1996 jyly AQSh-tyń Atlanta qalasyna ótken edi. Onda jambyldyq jas boksshy Ermahan Ibraımov tý alyp shyqty. Bul Olımpıadada sportshy «qola» júlde aldy. Jalpy esepte Qazaqstan 11 medalmen 197 el arasynda 24-orynǵa turaqtady.





4 jyldan keıin Aýstralııanyń Sıdneı qalasynda ótken kezekti Olımpıadada da Ermahan Ibraımov tý ustaýshy boldy. Ázirge E. Ibraımov – Qazaqstanda eki Olımpıadada tý alyp shyqqan jáne ekeýinde de júldemen oralǵan jalǵyz sportshy. Sıdneı oıyndarynda boksshy Qazaqstan qanjyǵasyna «altyn» ákeldi. Sıdneıdiń taǵy bir chempıony Bekzat Sattarhanov ekeýi boks juldyzdaryna aınaldy. Qazaqstan Olımpıada nátıjesi boıynsha 199 memleket arasynan 22-orynǵa kóterildi.




2004 jylǵy dástúrli doda Olımpıada otany – Grekııada ótti. Saltanatty ashylýda Qazaqstan týyn dzıýdoshy aıbyndy Ashat Jitkeev alyp shyqty. Odan halyqtyń Ermahan Ibraımovtyń jolyn, jeńisin kútkeni ras. Bul dodada A. Jitkeev 7-oryn alyp, júldege ilige almady. Jalpy Qazaqstannyń nátıjesi tómen bolyp, 201 eldiń arasynda 40-orynǵa bir-aq syrǵydy. Degenmen, 2008 jyly Beıjiń Olımpıadasynda 27 jastaǵy Ashat Jitkeev «kúmis» júldege qol jetkizdi. Bul – Qazaqstannyń dzıýdo baǵytyndaǵy alǵashqy Olımpıada medali boldy.




2008 jylǵy Beıjiń Olımpıadasynda Qazaqstan týyn alyp shyǵý mártebesi aýyr atletıkadan Azııa chempıony Baqyt Ahmetovke berildi. Baqyt Ahmetov Sıdneı Olımpıadasynda 15-shi oryn, Afına Olımpıadasynda – 7-oryn alǵan edi. Beıjiń oıyndarynda 415 keli nátıjemen 5-oryn aldy. Qazir Baqyt Ahmetov – aýyr atletıkadan Qazaqstan quramasynyń bas bapkeri. Onyń saltanatty sherýdegi ulttyq kıimin tanymal dızaıner, stılıst Quralaı Nurqadilova tikken edi. Qazir bul kostıým Olımpıada esteligi retinde Beıjińdegi mýzeıde tur.





2012 jyly Londonda ótken Olımpıada oıyndarynda elimizdiń kók baıraǵyn grek-rım kúresiniń balýany, Azııanyń eki dúrkin chempıony Nurmahan Tinálıev ustap shyqty. Alaıda jarys jolyn 1/8 fınaldan bastaǵan N. Tinálıev shvetsııalyq Eýren Iohannan jeńilip qaldy. 2016 jyly Rıo Olımpıadasynda Londonda ketken eseni qaıtarǵysy keldi. Degenmen, bul joly sáttilik serik bolmady, N. Tinálıev alǵashqy beldesýine nemis sportshysy Edýard Poptannan jeńilip qaldy. Keıinirek ol 2018 jyly Indonezııada ótken Azııa oıyndarynda jaraqatpen kúresip, ekinshi oryn aldy. 2019 jyldyń qarashasynda Máskeý Gran-prıinde, jeltoqsanda Almatyda Sporttyq jekpe-jek jáne kúsh qoldanylatyn sport túrlerinen Konfederatsııa kýbogyna qatysty. Al 2020 jyly N. Tinálıev Frantsııada grek-rım kúresinen ótken Gran-prı básekesinde «kúmis» júlde aldy.






Rıo-de-Janeıro qalasynda ótken HHHІ jazǵy olımpıadada 20 jastaǵy taekvondoshy Rýslan Japarov tý ustaýshy boldy. Alaıda sportshy alǵashqy aınalymda ázerbaıjandyq qarsylasy Radık Isaevtan 11:2 esebimen jeńildi. Jubanysh kezdesýindegi jekpe-jekte te otandasymyz 29 jastaǵy ońtústikkoreıalyq Chha Don Mınnen jeńilip qaldy. Rýslan Japarov bıyl da Tokıo Olımpıadasyna qatysýǵa joldama aldy. Ol taekvondoda 80 keliden joǵary salmaq dárejesinde el namysyn qorǵaıdy. 27 shilde kúni alǵashqy qarsylasy germanııalyq Aleksandr Bahmanmen boz kilemge shyǵady.





Bıyl Tokıo Olımpıadasy qarsańynda Prezıdent Qasym-Jomart Toqaev Qazaqstan Respýblıkasynyń Memlekettik Týyn alǵash ret eki birdeı tý ustaýshyǵa – jeńil atletıkadan Olımpıada chempıony Olga Rypakova men bokstan álem chempıonatynyń kúmis júldegeri Qamshybek Qońqabaevqa tabystady. Sportshylar týdyń Tokıo tórinde jıi kóterilip, Ánurannyń shyrqalýy úshin baryn salýǵa ýáde berdi.

Olga Rypakova – Óskemen qalasynyń týmasy, buǵan deıin úsh Olımpıadaǵa qatysyp, úsheýinen de júldemen oralǵan tájirıbeli sportshy. Ol úsh qarǵyp sekirý boıynsha 2008 jyly Beıjiń qalasynda «kúmis» medal alǵan, 2012 jyly Londonda – «altyn» jáne 2016 jyly Rıo-de-Janeıroda – «qola» medal alǵan. Odan bólek, Olganyń enshisinde Ýnıversıada «altyny» jáne Azııa oıyndarynyń 6 altyn medali bar. Sondaı-aq, ol álem chempıony jáne 2010 jylǵy qurlyqtyq kýbogtiń ıegeri.

Qamshybek Qońqabaev – Olımpıada sharshy alańynda zor jaýapkershilikke ıe bolǵan boks quramasynyń kapıtany. Ol 2014 jyly áskerıler arasynda ótken álem chempıonatynyń jeńimpazy. Azııa chempıonatynyń eki dúrkin jeńimpazy jáne 2017 men 2019 jylǵy álem chempıonattarynyń kúmis júldegeri. Tokıo Olımpıadasy 29 jastaǵy qyzylordalyq sportshy úshin alǵashqy Olımpıada oıyndary bolmaq.

Aıta keteıik, Olımpıada oıyndarynyń ashylý saltanaty 23 maýsymda Tokıo Olımpıada stadıonynda ótedi. Qazaqstan quramasynda sporttyń 28 túrinen Olımpıadanyń 97 joldamasy bar.

Buǵan deıin QazAqparat agenttigi 1996 jyldan beri Qazaqstan quramalarynyń Olımpıada ashylýyna kıgen saltanatty formalaryna sholý jasaǵan edi.









Avtor Aıjan Serikjanqyzy
Basty sózder: Olımpıada, Sport,
Joǵary qaraı