Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Nurjan Núpbaev: Qutqarýshy qandaı jaǵdaı bolmasyn salqynqandylyq tanytý kerek

2021 jyldyń 19 qazan 2021 09:47

ÓSKEMEN. QazAqparat – Qıyn jaǵdaıǵa tap bolǵandarǵa kómek qolyn sozatyn, tilsiz jaýmen kúreste aldyńǵy qatarda turatyn qutqarýshylar búgin kásibı merekesin atap ótýde. Nurjan Núpbaevtyń osy mamandyqty tańdap, ter tógip júrgenine 15 jyldan asqan. Semeı qalasyndaǵy №2 mamandandyrylǵan órt sóndirý bóliminde aǵa órt sóndirýshi-qutqarýshy bolyp jumys isteıtin ol QazAqparat tilshisine suhbat berdi.

- Áńgimemizdi týyp-ósken jerińizden bastasaq?

- 1983 jyly Shyǵys Qazaqstan oblysy Besqaraǵaı aýdany Qaramyrza aýylynda jaryq dúnıe esigin ashtym. Sondaǵy orta mektepti támámdap, 2001-2003 jyldary aralyǵynda Almaty oblysynda Otan aldyndaǵy boryshymdy ótedim. Áskerden soń eki jyl aýylda bolyp, keıin Semeı qalasyndaǵy №46 órt sóndirý bólimine jumysqa ornalastym. 3 jyl ótkende bólimshe komandıri bolyp taǵaıyndaldym. 2013 jyly №2 mamandandyrylǵan órt sóndirý bólimine aýysyp, osy ýaqytqa deıin sol jerde órt sóndirýshi-qutqarýshy bolyp eńbek etip kelemin.

- Qutqarýshynyń bir kúni qalaı ótedi?

- Ár kúnde ár túrli oqıǵalar bolyp jatady. Mezgilge de baılanysty. Qys kezinde qala irgesindegi tasjoldarǵa shyǵamyz. Qar qursaýynda qalǵan adamdardy evakýaktsııalap, kólikterdi jol talǵamaıtyn tehnıkamen súıreımiz. Byltyr «Almaty-Semeı» tasjolynyń 30 shaqyrymynda boran saldarynan 18 kólik jolda qaldy. Habar túsisimen dereý sol jerge attandyq. Eń áýeli 45 adamdy qaýipsiz jerge kóshirgen soń, qaıtyp kelip avtokólikterdi súırep jetkizdik.




Kóktem shyqqanda sý tasqynynyń álegi bastalady. Kóbinese sý basqan jer úılerge baryp, turǵyndarǵa kómektesemiz. Osy rette, sý sorǵysh tehnıkalardy qoldanamyz.

Jol-kólik oqıǵalary kezinde de bizge habarlasyp jatady. Kólikke qystyrylyp qalǵan adamdardy shyǵaryp, jedel járdem dárigerlerine tapsyramyz. Sondaı-aq shuńǵyrǵa qulaǵan janýarlardy qutqaramyz.

Úıde qamalyp qalǵan balalarǵa kómektesý de – bizdiń mindet. Sondaı bir oqıǵa bıyl kóktemde boldy. Lermontov kóshesinde 2 bala balkonda qamalyp qalǵan-tuǵyn. 5 jáne 7 jastaǵy balaqaılar jetinshi qabattyń balkonynda tońyp turdy. Esik ishten de ashylmaı qalǵan. Sóıtip, Madııar esimdi áriptesimiz 8-shi qabattan jip arqyly balkonǵa túsip, esikti ashty. Balalar aman-esen ájelerimen qaýyshty.

- Qutqarýshynyń jumysy qıyn-aq. Osy joldy tańdaǵanyńyzǵa ókingen kezder boldy ma?

- Joq. Esh ókinbeımin. Jumysym ózime unaıdy. Árıne, qutqarýshy bolý ońaı emes. Qıyndyq pen túrli qaýip-qater kóp. Bıik ǵımaratqa shyqqanda ekpindi jel úreılendirse, qyraýly qysta kólikpen kómekke asyǵys umtylǵanda kóktaıǵaq qaýip tóndiredi. Alaıda bireýge paıdań tıip, eldiń alǵysyn estigende barlyǵyn umytasyń.




- Otbasyńyz jaıly aıtyp ótseńiz.

- Áıelim, 4 jasar qyzym bar. Anam qolymda turady. Balapanym balabaqshaǵa barady. Áýletten órt sóndirýshi bolǵan tek ózim ǵanamyn.




- Qutqarýshy bolý úshin qandaı qasıet kerek dep oılaısyz?

- Osy mamandyqty tańdaǵan adam shydamdy, eńbekqor jáne psıhologııalyq turǵyda myqty bolý qajet. Keıbireýler aıaq-qoly syńǵan nemese qan-josa bolyp jaralanǵan adamdardy kórgende júıkesi syr berip, jumystan shyǵyp ketip jatady. Qutqarýshy qandaı jaǵdaı bolmasyn salqynqandylyq tanytý kerek. Eshqashan emotsııaǵa erik berýge bolmaıdy. Sebebi seniń qolyńda adam ómiri tur. Jaýapkershilikti sezinip, batyl qımyldaı bilý kerek.

- Áńgimeńizge kóp rahmet!


Joǵary qaraı