Aýa raıy
Astana -15 °S
Almaty -9 °S
valıýta baǵamy
USD 421.58
EUR 496.83
RUB 5.53
CNY 62.20

«Nur-Sultan – Pavlodar» jolynyń 30 shaqyrymy qaıda ketti - mınıstrlik túsinik berdi

2020 jyldyń 29 qarasha 2020 10:45

NUR-SULTAN. QazAqparat – Jaqynda telearnalardyń birinde aıtylǵan «Nur-Sultan-Pavlodar» aralyǵyndaǵy joldyń shaqyrymdyq kórsetkishi durys eseptelmegeni týraly málimet shyndyqqa janaspaıdy. Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıteti baspasóz qyzmetinen málim etti, dep habarlaıdy QazAqparat tilshisi.

«Shyn máninde elordadan Pavlodar qalasyna deıingi araqashyqtyq – 415 shaqyrym. Avtomobıl joly ýchaskesiniń bastalýyna deıingi 16 shaqyrymda QR Parlamentiniń ǵımaraty ornalasqan, ıaǵnı Nur-Sultannan bastalatyn respýblıkalyq joldardyń shaqyrymdyq esepteýi atalǵan ǵımarattan bastalady. Osy arqyly «Nur-Sultan-Pavlodar» jolynyń jalpy araqyshyqtyǵy 431 shaqyrymdy qurap tur» delingen komıtet málimetinde.

Vedomstvo ókilderiniń habarlaýynsha, joldyń shaqyrymdyq kórsetkishin kóliktegi odometrmen esepteý naqty málimetti kórsetpeıdi, sebebi bul qural araqashyqtyqty týra kórsete almaıdy.

«Kólikterge ornatylǵan odometrlerdiń barlyq túri naqty kórsetkish quraldary sanatyna jatqyzylmaǵan. Mehanıkalyq odometrden bolatyn qatelik 5 paıyzǵa deıin jetedi. Avtomobıldi paıdalaný jaǵdaıyna, jabdyqtar men bólshekterdiń tozýyna qaraı, sondaı-aq sáıkes kelmeıtin bólshekterdi paıdalaný saldarynan odometr 12-15 paıyzǵa deıin qate málimet kórsetýi yqtımal. Joldyń shaqyrymdyq araqashyqtyǵyn jyljymaly zerthanalar esepteıdi. Onda naqty kásibı quraldar ornatylǵan», - dep túsindirdi komıtet ókilderi.

Taratylǵan málimetke qaraǵanda, «Nur-Sultan-Pavlodar» jolynyń tıtýlyna sáıkes, avtojol eki ýchaskeden quralady.

Birinshisi – ol 16-254 shaqyrymdaǵy «Nur-Sultan-Ereımentaý» aralyǵy, jalpy araqashyqtyǵy 238 shaqyrymdy qamtyp tur. Onyń ishinde 184 shaqyrymy, ıaǵnı 16-dan 200-shi shaqyrym aralyǵy Aqmola oblysy aýmaǵynan ótedi, Pavlodar oblysy aýmaǵynda 54 shaqyrym – 200-den 254-shi shaqyrym aralyǵynda. 0-den 16-shaqyrymǵa deıingi ýchaske - ol QR Parlamentinen respýblıkalyq jol bastalatyn ýchaskege deıingi aralyq.

Ekinshi ýchaske – Shiderti aýylynan Pavlodar qalasyna deıingi aralyq, Pavlodar oblysy aýmaǵyndaǵy joldyń araqashyqtyǵy 177 shaqyrym.

«Nurly jol» baǵdarlamasyn júzege asyrý aıasynda joldyń 415 shaqyrymnyń 412-si qaıta tóseldi. Onyń ishinde Aqmola oblysy boıynsha 184 shaqyrym, al Pavlodar oblysy aýmaǵynda 228 shaqyrym qamtyldy. Qalǵan 3 shaqyrym Pavlodar qalasynyń aýmaǵynda ornalasqan.

2014 jyldan bastap «Nur-Sultan-Pavlodar» jolyn qaıta salýǵa 237 938,3 mln teńge bólindi. Pavlodar oblysyndaǵy jobaǵa 117 751,8 mln teńge qarastyrylyp, sonyń 117 162,2 mln teńgesi ıgerildi.

Aqmola oblysy aýmaǵyndaǵy jolǵa 120 186,58 mln teńge bólinip, onyń somasy tolyqtaı ıgerilgen.


Joǵary qaraı