Aýa raıy
Astana -5 °S
Almaty 5 °S
valıýta baǵamy
USD 421.58
EUR 496.83
RUB 5.53
CNY 62.20

«Nur Otan» zeınetaqy jınaǵyn alý kezinde 10% salyq salýdan bas tartýdy usynady

2020 jyldyń 15 qyrkúıek 2020 14:01

NUR-SULTAN. QazAqparat - «Nur Otan» partııasy zeınetaqy jınaqtaryn merziminen buryn alý kezinde 10%-dyq salyq salýdan bas tartýdy usynady, dep habarlaıdy QazAqparat.

Memleket basshysy Qasym-Jomart Toqaev óziniń Qazaqstan halqyna Joldaýynda 2021 jyldyń ózinde Biryńǵaı jınaqtaýshy zeınetaqy qorynyń 700 myń salymshysy óz jınaǵynyń bir bóligin turǵyn úı alýǵa, emdelýge nemese basqarýshy kompanııalardyń ıeligine berýge paıdalana alýy mindetin qoıdy. El Prezıdenti atap ótkendeı, bul másele ásirese, dál qazir erekshe mańyzdy. Óıtkeni, azamattardyń «áleýmettik ál-aýqaty, eń aldymen, baspana máselesine tikeleı baılanysty».

Sonymen qatar, Salyq kodeksine sáıkes qazaqstandyqtardyń zeınetaqy jınaqtarynyń merziminen buryn alynǵan bóligine 10 paıyzdyq tabys salyǵy salynatyn bolady.

Osyǵan baılanysty, partııalyq kýrator, Parlament Májilisindegi «Nur Otan» partııasy fraktsııasynyń múshesi Artýr Platonov zeınetaqy jınaqtaryn merziminen buryn alý kezinde 10 paıyzdyq salyq salýdy alyp tastaý boıynsha zańnamaǵa ózgerister engizýdi usyndy.

«Nur Otan» partııasy Memleket basshysynyń bastamasy, eń aldymen, halyqty áleýmettik qoldaýǵa baǵyttalǵan, sondyqtan zeınetaqy jınaqtarynyń bir bóligin paıdalaný kezinde erekshe jaǵdaılar qarastyrý qajet dep esepteıdi.

«Azamattardyń zeınetaqy jınaqtaryn alý kezinde salyq túrinde ustaýǵa josparlanǵan qarajat memlekettiń barlyq ekonomıkalyq máselelerin sheshpeıdi, biraq turǵyn úı máselesin sheshýde, muqtaj azamattardy emdeýde aıtarlyqtaı kómek bola alady», - dedi Artýr Platonov.


Joǵary qaraı