Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Nur Otan partııasynyń aımaqtyq fılıaldarynda birqatar aýys-túıis boldy

2021 jyldyń 21 qańtar 2021 16:44

NUR-SULTAN. QazAqparat - Nur Otan aımaqtyq fılıaldary basshylyǵynda birqatar kadrlyq jańartýlar júrgizildi. Ortalyq apparattyń baspasóz qyzmeti habarlaǵandaı, jańa taǵaıyndaýlar «Nur Otan»-nyń saılaýaldy ýádelerin tıimdi júzege asyrýǵa qatysty partııa Lıderi qoıǵan mindetterdi eskere otyryp júrgizildi.

Elbasy, partııa Lıderi Nursultan Nazarbaevtyń bıliktiń atqarýshy jáne ókildi organdarynda basshylyqtaǵy áıelderdiń úlesin 30%-ke deıin ulǵaıtý týraly tapsyrmasyn oryndaý aıasynda, «Nur Otan» Almaty oblystyq fılıaly tóraǵasynyń birinshi orynbasary Gúlnar Toılybaeva boldy.

Ol partııada 2007 jyldan bastap bólim meńgerýshisinen oblystyq fılıal tóraǵasynyń orynbasaryna deıingi eńbek jolynan ótken.

Sondaı-aq, «Nur Otan» partııasynyń Shymkent qalalyq fılıaly tóraǵasynyń birinshi orynbasary bolyp Janar Bektaeva taǵaıyndaldy.

Ol 2019 jyldan bastap Shymkent qalasy ákimdiginiń ishki saıasat basqarmasynyń basshysy bolyp jumys istedi.

Memleket basshysy Qasym-Jomart Toqaevtyń belsendi jastarǵa arnalǵan áleýmettik lıft qurý jónindegi tapsyrmasyn iske asyrý aıasynda Nur Otan elordalyq fılıaly tóraǵasynyń birinshi orynbasary bolyp 30 jastaǵy Dáýlet Káribek taǵaıyndaldy.

Partııanyń Saıası keńesi Bıýrosynyń jáne Prezıdenttik jastar kadrlyq rezerviniń múshesi. Sarapshydan bastap «Jas Otan» jastar qanatynyń tóraǵasyna deıingi qyzmettik joldan ótti.

Sońǵy jumys orny – Nur-Sultan qalasy Jastar saıasaty máseleleri basqarmasynyń basshysy.

Almatyda partııanyń qalalyq fılıaly tóraǵasynyń birinshi orynbasary 33 jastaǵy Meıirjan Otynshıev boldy.

Ál-Farabı atyndaǵy QazUÝ men QR Prezıdenti janyndaǵy Memlekettik basqarý akademııasynyń túlegi.

Eńbek jolyn Almaty qalasy Jumyspen qamtý jáne áleýmettik baǵdarlamalar basqarmasynyń mamany bolyp bastaǵan.

Sońǵy 2 jylda Almaty qalasy ákimdiginiń Turǵyn úı saıasaty basqarmasy basshysynyń orynbasary bolyp istedi.

Saıası keńestiń aımaqtyq bıýrosynyń usynýymen partııanyń Jambyl oblystyq fılıaly tóraǵasynyń birinshi orynbasary bolyp Daýyl Beısenqulov taǵaıyndaldy.

Ol osy taǵaıyndaýǵa deıin Jambyl oblysy ákimdiginiń ishki saıasat basqarmasyn basqardy.

Partııanyń baspasóz qyzmeti taratqan aqparatqa sáıkes, Erlan Qanalımov (Nur-sultan), Stanıslav Kankýrov (Almaty), Bahadyr Narymbetov (Shymkent) jáne Janbolat Jórgenbaev (Almaty oblysy) atalǵan óńirler máslıhattarynyń hatshylary bolyp saılandy.

Óz kezeginde Aqmola, Aqtóbe, Almaty, Atyraý, Batys Qazaqstan, Qyzylorda, Mańǵystaý, Pavlodar, Soltústik Qazaqstan jáne Túrkistan oblystyq fılıaldary tóraǵasynyń birinshi orynbasarlary óńirlik máslıhattardaǵy «Nur Otan» fraktsııalarynyń basshysy qyzmetin qosa atqarady.

Baspasóz qyzmetinde atap ótkendeı, kadrlarǵa qatysty mundaı sheshim «Nur Otan» partııasynyń aımaqtyq saılaýaldy baǵdarlamalaryn sapaly júzege asyrý jáne saılaýaralyq kezeńde tıisti jumysty uıymdastyrý boıynsha partııa basshylyǵy qoıǵan mindetterge tolyq jaýap beredi.

Joǵary qaraı