Aýa raıy
Astana 15 °S
Almaty 11 °S
valıýta baǵamy
USD 412.55
EUR 468.66
RUB 5.79
CNY 58.80

Musylmandardyń ulyq merekesi – qasıetti Qurban aıt bastaldy

2020 jyldyń 31 shilde 2020 07:18

NUR-SULTAN. QazAqparat – Búgin kúlli musylman úshin ulyq sanalatyn Qurban aıt merekesi bastaldy, dep habarlaıdy QazAqparat.

Oraza aıttan keıin 70 kún ótkende keletin Qurban aıt merekesin kópshilik musylman 3 kún qatarynan toılaıdy. Bıylǵy Qurban aıt merekesi ǵulamalar keńesiniń bekitýimen 31 shilde, 1-2 tamyz kúnderine sáıkes kelip tur. ıAǵnı ulyq merekeniń alǵashqy kúni – qasıetti jumaǵa dóp keldi. Áıtse de, elimizdegi karantın merzimi 2 tamyzǵa deıin uzartylǵandyqtan, respýblıka boıynsha meshitter jabyq. Osyǵan baılanysty 31 shilde kúni Qurban aıt namazy oqylmaıdy.

Eldegi epıdemıologııalyq ahýal Qurban aıt meıramyn jyldaǵydaı merekeleýge múmkindik bermeı tur. Bul jaǵdaıǵa buǵan deıin Qazaqstan musylmandary dinı basqarmasy túsinistikpen qaraýǵa shaqyrǵan bolatyn.

Merekeniń basty rásimi – jaratýshy razylyǵy úshin qurban shalý. Bul rásim dinı nanym boıynsha Ibrahım paıǵambar zamanynan beri kele jatyr dep esepteledi. Qurban shalý ulyq ǵıbadat ári jaǵdaıy kelgen musylmanǵa ýájip. Osynaý ǵıbadatty oryndaý maqsatynda Qazaqstan Musylmandary dinı basqarmasy halyqtyń ótinishin eskere otyryp, bıyl alǵash ret Qurban aıt qarsańynda halyqaralyq tájirıbelerge súıenip, qashyqtan qurban shalý jobasyn qolǵa aldy. Osy maqsatta qurban2020.kz saıty ashylyp, 24 shildeden bastap táýlik boıy jumys isteı bastady. 30 shildege deıin qurban shalýǵa onlaın tapsyrys qabyldandy. Kez kelgen azamat onlaın qurban shalýǵa tapsyrys bere alady.

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń aıtýynsha, onlaın rejımde tapsyrys qabyldap, qurbandyq etin muqtaj jandarǵa taratý tájirıbesi Túrkııa, Malaızııa, Indonezııa, BAÁ syndy birqatar musylman memlekette burynnan qalyptasqan jáne dástúrge aınalǵan.

«Bul júıeniń basty ereksheligi – qurbandyq eti túgeldeı muqtaj jandarǵa taratylady. Alǵash ret iske qosylǵaly turǵan saıtta kemshilikter bolýy múmkin. Tehnıkalyq qıyndyqtar týyndasa, qurmetti halaıyq, túsinistikpen qaraýdy ótinemiz. Onlaın qurbandyq júıesin ashýdaǵy maqsat – syn-saǵatta paıda tabý emes, halyqtyń qurban shalýǵa degen qajettigin qamtamasyz etý. Dinı basqarmanyń maqsaty – azamattardyń qurbandyǵyn shalýdy uıymdastyrý. Onlaın tapsyrys arqyly qurbandyq shalý kezinde daǵdyǵa aınalǵan maldy tańdaý, qasapshy janyna baryp qatysý múmkindigi bolmaıyn dep tur. Bul jobany karantın kezinde qurban shalǵysy kelgen azamattardyń nıetin júzege asyrý múmkindigi retinde usynyp otyrmyz. Alla qalasa, atalmysh joba kelesi jyly óz jalǵasyn tabady dep úmittenemiz. Onlaın qurbandyq shalýda ımamdarymyz deldaldyq qyzmet jasamaıdy. Eki ortada júrip paıda tabýmen aınalyspaıdy. Bizdiń mindet – halyqqa qyzmet, qurbandyq shalýdy uıymdastyrý men qurban etterin muqtaj jandarǵa úlestirip berý ǵana», - degen edi Naýryzbaı qajy Taǵanuly Ortalyq kommýnıkatsııalar qyzmetinde ótken baspasóz máslıhatynda.

Osy kezge deıin azamattar qurban etin úshke bólip, bir bóligine aǵaıyn-týys, kórshi-qolańǵa aıt dastarhanyn jaıatyn. Pandemııa jaǵdaıyna baılanysty bıylǵy onlaın qurbandyq shalynǵanda ettiń úshten biri berilmeı, túgeldeı áleýmettik turǵyda az qamtylǵan azamattarǵa, muqtaj jandarǵa úlestiriletin boldy.

Karantın kezinde onlaın qurbandyq shalý jobasyna memleketimiz qoldaý kórsetip otyr. Ár oblysta qurban shalatyn oryndar belgilenip, jergilikti ákimdik pen sanıtarlyq dárigerlerdiń ruqsatymen, tártip saqshylarynyń qadaǵalaýymen karantın talaptaryn qatań túrde saqtaı otyryp oryndalady.

Bul rette Naýryzbaı qajy Taǵanuly ár oblystyń dinı ahýalyna jaýap beretin mekemelerdi dinı basqarmanyń oblystyq ókildikterimen birge jumys isteýge shaqyrdy. Osy maqsatta dinı basqarma men oblystyq meshitter janynan aqparat ortalyqtary da qurylǵan. Onlaın qurbandyq týraly bilgisi keletin azamattar osy ortalyqtarǵa habarlasa alady.

Qazaqstan musylmandarynyń dinı basqarmasy halyqty osyndaı qıyn-qystaý kezde pendeshilikke salynbaı, paıda tabý men alypsatarlyqqa barmaı, mal baǵasyn qymbattatpaýǵa, halyqtyń jaǵdaıyn eskerýge shaqyrady. Qasapshylar da óz qyzmetine alatyn aqysyn qymbattatpaı, janashyrlyqpen elge qyzmet eter dep úmittenedi.

Qurban shalý úshin oblys, qala ákimderin, sanıtarlyq-epıdemıologııalyq basqarma qyzmetkerlerin tártip saqshylarymen birlesip atsalysýǵa úndeıdi.


Avtor Aıan Bekenuly
Basty sózder: Qaýipsizdik, Karantın, Qoǵam, Din,
Joǵary qaraı