Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Múgedektigi bar adamdardyń ómir súrý sapasyn arttyrý boıynsha qandaı jumystar atqarylýda

2021 jyldyń 15 qazan 2021 22:00

NUR-SULTAN. QazAqparat - Eńbek jáne halyqty áleýmettik qorǵaý mınıstri Serik Shápkenov mınıstrliktiń alqa otyrysynda áleýmettik qamsyzdandyrýdy jaqsartý jáne múgedektigi bar adamdardyń ómir súrý sapasyn arttyrý boıynsha júrgizilip jatqan jumystar týraly aıtyp berdi, dep habarlaıdy QazAqparat.

Beınekonferentsııa baılanys rejımindegi is-sharaǵa Parlament depýtattary, Prezıdent Ákimshiliginiń, Premer-Mınıstr Keńsesiniń, «Atameken» UKP ókilderi, vıtse-mınıstrler, Eńbek mınıstrligi departamentteriniń dırektorlary men qoǵamdyq keńes músheleri, oblystar, Nur-Sultan, Almaty, Shymkent qalalary ákimderiniń orynbasarlary, óńirlik jumyspen qamtýdy úılestirý jáne áleýmettik baǵdarlamalar basqarmalarynyń basshylary qatysty.

Serik Shápkenov óz sózinde mınıstrlik múgedektigi bar adamdardyń ómir súrý sapasyn jaqsartý úshin sharalar keshenin iske asyryp jatqanyn atap ótti.

«Múgedektigi bar adamdardy áleýmettik qoldaý jáne ómir súrý sapasyn arttyrý memlekettik saıasattyń basty baǵyttarynyń biri jáne Eńbek jáne halyqty áleýmettik qorǵaý mınıstrliginiń birinshi kezektegi mindetteriniń biri bolyp tabylady. Memleket basshysynyń 12 qazanda azamattardyń osy sanatyn áleýmettik qamsyzdandyrýdaǵy birqatar jaqsartýshy normalardy qamtıtyn jańa zańǵa qol qoıýy mańyzdy oqıǵa boldy. Qujatta: múgedektiktiń I toby bar adamdardy kútý jáne olarǵa erip júrý boıynsha biryńǵaı járdemaqyny engizý; alynatyn járdemaqylardy ulǵaıta otyryp, balalardy 7 jastan bastap múgedektik toptary boıynsha bólý kózdeledi; múgedektigi boıynsha jáne asyraýshysynan aıyrylý boıynsha járdemaqyny bir mezgilde alý; múgedektigi bar balalardy tárbıelep otyrǵan otbasylarǵa turǵyn úı kezegin saqtaý jáne basqalary kózdelgen», – dedi mınıstr.

Vedomstvo basshysy múgedektigi bar adamdardyń ekonomıkalyq belsendiligi úshin múmkindikter jasalǵany týraly habardar etti.

«Elimizde 700 myńnan astam múgedektigi bar adam turady. Eńbek etýge qabiletti 126 myń adam ekonomıkada jumyspen qamtylǵan, bul shamamen 30%-dy quraıdy. Jumysty jaqsyraq tańdaý úshin olar úshin Kásipter atlasy ázirlendi, ol tirshilik-tynysynyń shektelý túrleri boıynsha 432 kombınatsııadan turady, shamamen 3 myń kásipti qamtıdy. Aǵymdaǵy jyly jumyspen qamtý sharalarymen 15 myń adam qamtyldy», – dedi Serik Shápkenov.

Mınıstr sondaı-aq áleýmettik jáne kásibı beıimdelý maqsatynda respýblıkanyń 11 óńirinde (Nur-Sultan, Almaty, Shymkent qalalary, SQO, BQO, Qostanaı, Aqmola, Túrkistan, Aqtóbe, Jambyl oblystary) «Ten Qogam» ortalyqtary jumys isteıtinin, olardyń 9-y osy jyly ashylǵanyn habarlady. Ortalyqtarda psıhologııalyq jáne quqyqtyq kómek, jumysqa ornalasýǵa járdem kórsetiledi. Jyl sońyna deıin mundaı ortalyqtar barlyq óńirlerde ashylatyn bolady.

«Áleýmettik ońaltý qyzmetterin keńeıtý úshin mınıstrlik jergilikti atqarýshy organdarmen birlesip balalarǵa arnalǵan 6 shaǵyn jınaqty ońaltý ortalyǵyn ashty (Pavlodar oblysy – 150 balany qamtý; Qyzylorda – 150; BQO – 100; Aqtóbe – 350; Aqmola oblysy – 100; Nur-Sultan qalasy – 150). Bul 5,8 myń balany nemese 47%-yn ońaltý qyzmetterimen qamtýǵa múmkindik berdi», – dep tolyqtyrdy Eńbekmıniniń basshysy.

Ońaltý quraldarymen jáne qyzmetterimen qamtamasyz etýdi jaqsartý úshin aǵymdaǵy jyldyń qańtarynan bastap Áleýmettik qyzmetter portalyna tolyq kóshý júzege asyryldy. Búgingi kúni portalǵa 393 myń jeke ońaltý baǵdarlamasy jiberildi, 261 myńy nemese 66,3%-y oryndaldy. Portal jumysy jetildiriletin bolady. Mobıldi nusqany ázirleý, Portal arqyly pılottyq formatta ınvataksı qyzmetin usyný jáne t. b. josparlanýda.

«Múgedektigi bar adamdardyń ómir súrý sapasyn arttyrý úshin mınıstrlik birqatar basym mindetterdi iske asyratyn bolady. Birinshiden, osy aıda 6 óńirde – Aqmola, BQO, Qaraǵandy, SQO, Almaty jáne Nur-Sultan qalalarynda medıtsınalyq-áleýmettik saraptamany syrttaı júrgizý boıynsha pılottyq jobany iske qosý. Qalǵan óńirlerde osy jyldyń sońyna deıin kezeń-kezeńimen engizý josparlanyp otyr. Saraptama ıesizdendirilgen medıtsınalyq qujattardyń negizinde, syrttaı, kórsetiletin qyzmetti alýshy men kórsetiletin qyzmetti berýshi arasyndaǵy baılanyssyz júrgiziletin bolady», – dedi Serik Shápkenov.

Ekinshiden, Memleket basshysynyń Ulttyq qoǵamdyq senim keńesiniń IV otyrysynda bergen tapsyrmasyna sáıkes Múgedekterdiń quqyqtary týraly konventsııaǵa Fakýltatıvtik hattamany ratıfıkatsııalaý týraly zań jobasy ázirlendi. Qujat Májiliske qaraýǵa engizildi.

Sonymen qatar, áleýmettik qyzmet júıesin jańǵyrtý jumystary júrgizilýde. Ulttyq jospardyń jobasy ázirlendi, onda áleýmettik qyzmet kórsetý júıesin jan basyna shaqqandaǵy qarjylandyrýǵa kóshirý jónindegi sharalar eskerilgen.

«Tórtinshiden, múgedektigi bar adamdardy ońaltý qyzmetterimen qamtýdy keńeıtý mindeti sheshiledi. 12 óńirde 2022-2024 jyldary árqaısysy 150 oryndyq jańa ońaltý ortalyǵyn salý josparlanǵan. Jobalyq-smetalyq qujattama ázirlenip, jer telimderi bólindi. Sonymen qatar, NUR OTAN partııasynyń baǵdarlamasyn iske asyrý jónindegi jol kartasyna sáıkes, aldaǵy 5 jylda memlekettik áleýmettik tapsyrys aıasynda balalarǵa arnalǵan 15 ortalyq ashý josparlanǵan», – dedi mınıstr.

Sondaı-aq, Nur Otan partııasynyń saılaýaldy baǵdarlamasyn iske asyrý jónindegi jol kartasyna sáıkes qoljetimdi ortany qamtamasyz etý boıynsha jumystar júrgizilýde. 2025 jylǵa deıin neǵurlym basym 22 myń obektige (memlekettik mekemeler, HQKO, emhanalar, densaýlyq saqtaý, bilim berý, mádenıet jáne sport obektileri), jyl saıyn 4 400 obektige qoljetimdilikti qamtamasyz etý josparlanǵan.

«11 qazandaǵy jaǵdaı boıynsha respýblıka boıynsha jyldyq jospar 76%-ǵa oryndaldy – azamattardyń barlyq sanattary úshin 3 322 obektige qoljetimdilik qamtamasyz etildi. Obektilerdi erekshe qajettilikteri bar adamdarǵa beıimdeý sapasyna monıtorıng júrgizý boıynsha qoǵamdyq baqylaýdyń óńirlik toptarynyń jumysy jandandyryldy. Barlyq eskertýler joıylǵannan keıin, beıimdelgen obektiler boıynsha aqparatty óńirler Qoljetimdilik kartasyna engizedi», – dedi Serik Shápkenov.

Joǵaryda kórsetilgen jol kartasynda «E-Sobes» aqparattyq júıesi negizinde tehnıkalyq quraldarmen jáne ońaltý qyzmetterimen qamtamasyz etý monıtorıngi kózdelgen.

«11 qazandaǵy jaǵdaı boıynsha respýblıka boıynsha qamtamasyz etý kórsetkishi shamamen 70%-dy qurady, jospar boıynsha – 80% jáne ótken jyldyń osy kezeńimen salystyrǵanda 21,5%-ǵa ósti. Bul óte jaqsy, biraq óńirlerdiń úshten birinen kóbi óz mindettemelerin oryndamaıdy. Qamtamasyz etý boıynsha eń tómen kórsetkishter Almaty qalasynda (61,2%); Túrkistan (64,8%) jáne Atyraý oblystarynda (65,9%) baıqalady», – dep túıindedi Eńbek mınıstrliginiń basshysy.


Basty sózder: Medıtsına, Áleýmettik qoldaý,
Joǵary qaraı