Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Monblandaǵy qazyna: Alpınıstke baǵaly tastardyń jartysy beriledi

2021 jyldyń 6 jeltoqsan 2021 08:54

PARIJ. QazAqparat – 8 jyl buryn Monblannan zúbarjat, jaqut jáne laǵyl tastar salynǵan qorap tapqan frantsýz alpınısi osy baǵaly tastardyń jartysyn alady. Bul qorap muzdyqtyń ústinde 1950 nemese 1966 jyldary Air India ushaǵy apatqa ushyraǵan kezde túsip qalýy múmkin, dep habarlaıdy QazAqparat BBC-ge silteme jasap.

Esimi jarııa etilmegen alpınıst 2013 jyly Monblan taýyndaǵy muzdyqtan metall qorap taýyp alǵan. Baǵaly tastardyń janyndaǵy paketterde «Úndistanda jasalǵan» degen jazý bolǵan. Sondyqtan, frantsýz bıligi onyń jarty ǵasyrdan astam ýaqyt buryn Monblanda apatqa ushyraǵan úndi laıneriniń jolaýshylarynyń birine tıesili dep boljaǵan.

Baǵy bar alpınıst Frantsııa zańyna sáıkes, tapqan oljasyn polıtsııaǵa alyp baryp, osy ýaqytqa deıin baǵaly zattardyń ıesiniń týystary tabylar ma eken dep kútken. Biraq, olar tabylmady.

Endi, segiz jyldan keıin Shamonı kommýnasynyń bıligi zańǵa sáıkes alpınıstpen baǵaly zattardy teńdeı bólisken. Onyń árbir bóligi 150 myń eýro dep baǵalanyp otyr. Shamonı meri Erık Fýrne Frans-press agenttigine osy týraly aıta otyryp, alpınısti zańǵa baǵynǵany úshin maqtap otyr.

Monblanda ótken ǵasyrda eki úndi laıneri qulaǵan. 1950 jylǵy apattan 48 adam, 1966 jyly – 117 adam mert boldy.

Frantsııa bıligi baǵaly tastardy Bombeıden (qazirgi Mýmbaı) Nıý-Iorkke ushqan ekinshi laınerdiń jolaýshysy ózimen birge alyp bara jatqan dep boljap otyr. Alpınıster eki apattan keıin birneshe ýaqyt ótse de Monblannan júk qaldyqtary men adam súıekterin taýyp otyrǵan.

2012 jyly taý bókterinen Úndistannan dılomatııalyq poshta salynǵan qap tabylǵan edi. Onda 1966 jylǵy gazetter, kúntizbeler men jeke hattar bolǵan. 1966 jyly áýe apatynan úndi ıadrolyq baǵdarlamasynyń ákesi Homı Djehangır Baba qaza tapqan.


Basty sózder: Álem,
Joǵary qaraı