Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memlekettik satyp alýlar shaǵyn jáne jańa bızneske qoljetimdi bola túsedi

2021 jyldyń 14 qazan 2021 18:37

NUR-SULTAN. QazAqparat – Qazaqstanda shaǵyn jáne jańa bıznes úshin memlekettik satyp alýlardy barynsha qoljetimdi etý josparlanyp otyr. Bul týraly QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov aıtty, dep habarlaıdy QazAqparat.

«Básekelestikti damytýdyń kelesi baǵyty – taýarlardy konkýrstan tys satyp alýdy qysqartý. Aralas ekonomıka jaǵdaıynda satyp alýdy júzege asyrý kezinde memleket ekonomıkanyń birqatar salalary úshin eń iri tutynýshy retinde áreket etedi. Búgingi tańda memlekettik jáne kvazımemlekettik satyp alýlar – kásipkerlikti qoldaýdyń qýatty quraly bolyp otyr. Sondyqtan biz shaǵyn jáne jańa bıznes úshin satyp alýlarǵa qoljetimdilikti barynsha jeńildetýimiz kerek. Sonymen birge, satyp alý rásimderi men bıýdjet shyǵystaryn ońtaılandyrý turǵysynan lottardy irilendirip, satyp alýdy ortalyqtandyrý, qarjylyq turaqtylyq, salyq tólemderi, jumys tájirıbesi boıynsha joǵary talap qoıý júrip jatyr, bul jańadan bastaıtyndar men shaǵyn kásiporyndar úshin satyp alýǵa qoljetimdilikti tolyǵymen qamtıdy», - dedi Rýstam Ahmetov Májilistegi dóńgelek ústelde.

Onyń aıtýynsha, taǵy bir sheshilmegen másele – bir kózden satyp alý. 2020 jylǵy derekterge sáıkes bir kózden memlekettik satyp alý kólemi 2 trln 300 mlrd teńgeden asty, bul memlekettik satyp alýdyń jalpy kóleminiń 40%-yn nemese JІÓ-niń 3,6%-yn quraıdy.

«Osyǵan baılanysty qazirgi kezeńde bir kózden satyp alýdyń 8 negizdemesin qoldanýdy shekteý usynylyp otyr, onyń ekeýin tolyǵymen alyp tastaý kerek. Osy shaǵyn ózgeristerdi iske asyrýdan jyl saıyn 49 mlrd teńgeden astam ekonomıkalyq tıimdilik baıqalýy múmkin», - dedi spıker.

Onyń aıtýynsha, básekege qabiletsiz satyp alýdy qysqartýdyń taǵy bir tásili – memlekettik tapsyrmalardy bólý úshin negizdemelerdiń tolyq tizbesin aıqyndaý. Statıstıka kórsetkendeı, memlekettik tapsyrmalarǵa bólinetin qarajat kólemi 2018 jylǵy 171 mlrd teńgeden 2020 jyly 378 mlrd teńgege deıin jyl saıyn ósip keledi.

«Usynylyp otyrǵan tizbe memlekettik tapsyrmalardy qarjylandyrýdyń ósýin shekteýge jáne odan ári qysqartý úshin quqyqtyq negiz qalaýǵa múmkindik beredi. Zań jobasynda usynylǵan qysqartýdan 30 mlrd teńge únemdelýi múmkin», - dedi Rýstam Ahmetov.


Joǵary qaraı