Aýa raıy
Astana -19 °S
Almaty -13 °S
valıýta baǵamy
USD 421.58
EUR 496.83
RUB 5.53
CNY 62.20

Memlekettik qyzmetterdi kórsetýge Blockchain tehnologııasy qoldanyla bastady

2020 jyldyń 25 qarasha 2020 14:54

NUR-SULTAN. QazAqparat - Azamattarǵa arnalǵan úkimet memlekettik qyzmetterdi Blockchain tehnologııasynyń kómegimen kórsete bastady, dep habarlaıdy QazAqparat.

«Azamattarǵa arnalǵan úkimet» memlekettik korporatsııasy Blockchain tehnologııasyn memlekettik qyzmetterdi kórsetý úrdisine alǵashqy bolyp engizdi.

Ázirshe bul tehnologııa jyljymaıtyn múlik kepil shartyn tirkeý boıynsha jeke tulǵalarǵa kórsetiletin memlekettik qyzmetke qatysty qoldanyla bastady.

Aldaǵy ýaqytta bul tájirıbe basqa da keń taralǵan qyzmetterge engizilýi yqtımal.

Bloktardyń tehnıkalyq rettelgen tizbegi túrindegi Blockchain júıesi jeke málimetterdi úshinshi tulǵalarǵa berý múmkindiginen saqtap, aqparattyq qaýipsizdik pen sapaly qyzmetti qamtamasyz etedi.

«Azamattarǵa arnalǵan úkimet» memlekettik korporatsııasynyń basqarma tóraıymy Ásemgúl Baltashevanyń aıtýynsha, Blockchain tehnologııasy kepil shartyn tirkeý úrdisin barynsha ońtaılandyrýǵa jol ashty.

«Buǵan deıin qyzmet alýshylar múlik kepil shartyn tirkeý úshin birneshe mekemeni aralaýǵa májbúr bolatyn. Máselen, jyljymaıtyn múlikke quqyqtardy tirkeý týraly anyqtamany alý úshin HQO-ǵa nemese egov.kz portalyna júginip, sosyn ony bankke aparatyn. Endi bank qyzmetkeri ótinim jasaǵanda qyzmet alýshynyń jyljymaıtyn múlikke quqyqtary jáne aýyrtpalyqtardyń bar-joǵy týraly málimetter avtomatty túrde tekseriledi. Endi adamdar emes, málimetter siz úshin «júgiretin» boldy», – deıdi Baltasheva.

Blockchain tehnologııasyn qoldaný arqyly atalǵan qyzmetti kórsetý merzimi úsh kúnnen bir kúnge deıin qysqaryp, bankke usynylatyn qujattar tizimi de azaıdy.

Endi qyzmet alýshy banktiń aqparattyq júıesinde múlik shartymen tanysyp, óziniń ETsQ-sy arqyly qol qoıady, al qyzmettiń nátıjesi – jyljymaıtyn múlikke quqyqtardy memlekettik tirkeý týraly habarlama qyzmet alýshynyń egov.kz elektrondyq portalyndaǵy jeke kabınetine joldanady.

Blockchain tehnologııasyn tańdaý barysynda jeli qoldanýshylarynyń áreketteriniń aıqyndyǵy, detsentralızatsııa jáne senimdi qorǵanys júıesi esepke alyndy.

Qazaqstanda kepil shartyn tirkeý boıynsha memlekettik qyzmetti osyndaı ádispen kórsetý úrdisi kommertsııalyq banktiń birimen júzege asýda.

«Azamattarǵa arnalǵan úkimet» basqa da ekinshi deńgeıli banktermen osy baǵytta qyzmet kórsetý týraly kelissózder júrgizip jatyr.

Sebebi Blockchain tehnologııasy ekijaqty kelisim jasasý kezinde úshinshi tulǵalardy kiristirmeı, qaýipsizdikti qamtamasyz etip, jyljymaıtyn múlik kepilimen beriletin nesıeni onlaın resimdeý jáne nesıe berý merzimin qysqartýǵa múmkindik beredi.


Joǵary qaraı