Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy jerdi sheteldikterge jeke menshikke jáne jalǵa berýge tyıym salatyn zańǵa qol qoıdy

2021 jyldyń 13 mamyr 2021 09:07

NUR-SULTAN. QazAqparat - Memleket basshysy «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy, dep habarlaıdy QazAqparat Aqordanyń baspasóz qyzmetine silteme jasap.

2016 jylǵy 6 mamyrda QR Prezıdentiniń Jarlyǵymen aýyl sharýashylyǵy jerlerin sheteldikterge, azamattyǵy joq adamdarǵa, sheteldik kompanııalarǵa, sondaı-aq sheteldik úlesi bar qazaqstandyq kompanııalarǵa jalǵa berýge, sondaı-aq Qazaqstan Respýblıkasynyń azamattary men zańdy tulǵalaryna jeke menshikke berýge moratorıı engizildi.

Moratorıı merzimi 2021 jyldyń 31 jeltoqsanynda aıaqtalatynyn eskere otyryp, Qazaqstan Respýblıkasynyń Prezıdenti Qasym-Jomart Kemeluly Toqaev 25 aqpanda Ulttyq qoǵamdyq senim keńesiniń besinshi otyrysynda sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zańnama júzinde birjola tyıym salýdy tapsyrdy. Prezıdent 12 naýryzda osyndaı zań jobasyn Parlamentke jibergenin málimdedi.

7 sáýirde Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy.

14 sáýirde jerdi sheteldikterge berýge birjola tyıym salýdy kózdeıtin zań jobasyn Májilis Senatqa joldady.

29 sáýir kúni Senat «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» zań jobasyn Májiliske qaıtarǵan edi.

Májilis jerdi sheteldikterge satpaý týraly qujatqa Senat engizgen ózgeristermen kelisti.

Atalǵan zań boıynsha aýyl sharýashylyǵy jerlerin sheteldikterge, azamattyǵy joq adamdarǵa, sheteldik zańdy tulǵalarǵa, sheteldik qatysýy bar Qazaqstan Respýblıkasynyń zańdy tulǵalaryna, halyqaralyq uıymdarǵa, halyqaralyq qatysýy bar ǵylymı ortalyqtarǵa, sondaı-aq, qandastarǵa jeke menshikke jáne jalǵa berýge tyıym salynady.
Osylaısha aýyl sharýashylyǵy jerlerin paıdalaný quqyǵy tek qana Qazaqstan azamattaryna jáne sheteldik qatysýy joq zańdy tulǵalarǵa beriledi.

Joǵary qaraı