Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy Majarstannyń syrtqy ister mınıstrin qabyldady

2021 jyldyń 6 sáýir 2021 19:21

NUR-SULTAN. QazAqparat – Memleket basshysy Majarstannyń syrtqy ister jáne syrtqy saýda mınıstri Peter Sııartony qabyldady, dep habarlaıdy Aqordanyń resmı saıty.

Kezdesý barysynda Qasym-Jomart Toqaev Qazaqstan men Majarstan arasyndaǵy senimdi saıası dıalogqa, dáıekti ekonomıkalyq jáne ınvestıtsııalyq yntymaqtastyqqa, COVID-19 pandemııasynyń syn-qaterleri kezinde ózara qoldaý kórsetýge negizdelgen strategııalyq seriktestiktiń joǵary qarqynyn atap ótti.

Qazaqstan Prezıdenti bıylǵy 31 naýryzda «Túrkistan – túrki áleminiń rýhanı astanasy» taqyrybynda onlaın rejımde ótken Túrkitildes memleketterdiń yntymaqtastyq keńesiniń beıresmı sammıtine qatysqany úshin Majarstannyń Premer-Mınıstri Vıktor Orbanǵa rızashylyǵyn jetkizýdi tapsyrdy.

– Júrgizilgen kelissózder Qazaqstan men Majarstan arasyndaǵy qatynastardyń odan ári damýyna tyń serpin beredi dep úmittenemin. Qazaqstan osydan 30 jyl buryn Eýropa elderiniń ishinde birinshi bolyp Majarstanda óz elshiligin ashty. Bizdiń qarym-qatynastarymyz erekshe. Qazaqstandyqtar Majarstandy óte jaqsy biledi. Sizdiń elińizdi jaqyn tartady. Osy múmkindikti paıdalana otyryp, Túrkitildes memleketterdiń yntymaqtastyq keńesiniń jumysyna eleýli úles qosqany úshin Premer-Mınıstr Vıktor Orbanǵa rızashylyǵymdy bildiremin, – dedi Memleket basshysy.

Óz kezeginde Peter Sııarto kezdesýge múmkindik týǵyzǵany úshin Qazaqstan Prezıdentine alǵys bildirip, óz eliniń basshylyǵynyń sálemin jetkizdi. Osy rette Býdapeshttiń Qazaqstanmen keshendi yqpaldastyǵyn odan ári nyǵaıtýǵa, sonyń ishinde, Túrki keńesiniń áleýetin paıdalana otyryp tereńdetýge daıyn ekenin aıtty. Majarstannyń Syrtqy ister jáne syrtqy saýda mınıstri Túrkistannyń rýhanı astana retindegi mańyzdy róline toqtaldy.

– Sizdiń, Prezıdent myrza jáne Elbasynyń Majarstanda bedelderińiz zor. Biz Qazaqstan men onyń halqynyń dostyq, baýyrlastyq qatynasyn sezinemiz. Túrkitildes memleketterdiń yntymaqtastyq keńesine baqylaýshy retinde qatysýymyz elderimiz arasyndaǵy strategııalyq seriktestiktiń nátıjesi. Qazaqstan biz úshin – mańyzdy strategııalyq seriktes, – dedi Peter Sııarto.

Taraptar Vıktor Orbannyń 2019 jyly sáýirde Qazaqstanǵa jasaǵan resmı sapary barysynda qol jetkizgen ýaǵdalastyqtardy júzege asyrý jónindegi ekijaqty qatynastarǵa qatysty birqatar máseleni talqylady.


Joǵary qaraı