Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy Qarýly Kúshterdi qurý men damytýdyń jańa tujyrymdamasyn bekitti

2021 jyldyń 25 qyrkúıek 2021 17:19

NUR-SULTAN. QazAqparat - Qazaqstan Prezıdenti – Joǵarǵy Bas qolbasshy Qasym-Jomart Toqaev Qarýly Kúshterdi, basqa da áskerler men áskerı qurylymdardy qurýdyń jáne damytýdyń jańa tujyrymdamasyn bekitti, dep habarlaıdy Aqorda.

QR Qorǵanys mınıstrligi Tujyrymdama jobasyn Memleket basshysynyń 2019 jylǵy 2 qyrkúıektegi Qazaqstan halqyna Joldaýyn iske asyrý aıasynda ázirledi. Bul qujatty daıyndaýǵa uzaqmerzimdi perspektıvadaǵy damýǵa qatysty boljamdardy eskere otyryp, qazirgi áskerı-saıası ahýal men shet memleketterdegi áskerı qurylystyń úrdisteri negiz boldy.

QR Qaýipsizdik Keńesiniń Apparaty Tujyrymdama jobasyn jan-jaqty pysyqtaǵannan keıin, qujat bıylǵy jylǵy mamyrda QR Qaýipsizdik Keńesiniń otyrysynda maquldandy.

Tujyrymdamada áskerı qaýipsizdik organdaryn 2030 jylǵa deıin qalyptastyrýdyń jáne damytýdyń negizgi prıntsıpteri men ustanymdary qamtylǵan. Bul qujat aıasynda atqarylatyn is-sharalar memlekettiń qorǵanys qabiletin arttyrýǵa, Qarýly Kúshterdiń, basqa da áskerler men áskerı qurylymdardyń jaýyngerlik ázirligin qamtamasyz etýge, sonyń ishinde daǵdarys jaǵdaıyndaǵy áreket etý múmkindikterin keńeıtýge baǵyttalǵan.

Qazaqstan tarıhynda alǵash ret áýe-ǵaryshtyq jáne zymyran shabýylyna qarsy qorǵanystyń tıimdi júıesiniń elementterin qalyptastyrý josparlanyp otyr.

Eldiń orasan zor aýmaǵyn jáne shekaralardyń uzaqtyǵyn eskere otyryp, áskerı-kólik avıatsııasynyń kúshteri men quraldaryn jetildirý arqyly áskerlerdiń mobıldiligin arttyrý sharalary qarastyrylǵan.

Sondaı-aq, arnaıy operatsııalardy oryndaıtyn kúshterdi damytýǵa basa mán berilgen.

Qoǵamnyń barlyq salasyn tsıfrlandyrý sheńberinde Qarýly Kúshterdiń kıber- jáne aqparattyq keńistiktegi is-áreketter jónindegi áleýeti kúsheıtiledi.

«Qos maqsattaǵy», ıaǵnı soǵys jáne beıbit ýaqytta, sonyń ishinde tótenshe jaǵdaılardyń saldaryn joıý úshin qoldanylatyn komponentterdi damytý josparlanǵan. Eń aldymen, mundaı quramdarǵa áskerı medıtsına, radıatsııalyq, hımııalyq jáne bıologııalyq qorǵanys áskerleri, ınjenerlik áskerler, áskerı-kóliktik avıatsııa jatqyzyldy.

Jaýyngerlik ázirlikti arttyrý, áskerı bólimderdiń ońtaıly ornalasýyn, áskerı ınfraqurylymnyń qalyptasýyn, sonymen qatar turǵyndardyń qaýipsizdigin qamtamasyz etý maqsatynda tıisti ınfraqurylymy bar keshendi áskerı bazalardy qurýǵa birtindep kóshý josparlanýda.

Sondaı-aq áskerı bilim berý, mansaptyq ósý, áskerı qyzmetshilerdi moraldyq jáne materıaldyq turǵydan yntalandyrý, quqyqtyq tártip pen áskerı tártipti nyǵaıtý, jastarǵa áskerı patrıottyq tárbıe berý sharalaryn júzege asyrý kózdelgen.

Qarýly Kúshterdi jaraqtandyrýdyń negizgi baǵyttary belgilengen. Bul otandyq qorǵanys ónerkásibi kesheni tarapynan qamtamasyz etiletin bolady jáne kásiporyndardyń óndiristi barynsha tıimdi josparlaýyna múmkindik beredi.

Jalpy bul Tujyrymdamany iske asyrý memlekettiń qorǵanys qabiletin jáne áskerı qaýipsizdiktiń zamanaýı qaterlerine qarsy daıarlyǵyn arttyrýǵa jáne beıbit ýaqyttaǵy mindetterdi tıimdi oryndaýǵa baǵyttalǵan.

Qazirgi áskerı qaqtyǵystardy eskere otyryp, jańa Tujyrymdamada kózdelgen tásilderge sáıkes, bıylǵy 6-23 qyrkúıek aralyǵynda Qazaqstan aýmaǵynda «Otpantaý-2021» keshendi áskerı oqý-jattyǵý jıyny ótkizildi.

Oqý-jattyǵý jıyny barysynda áskerı qaterler kezindegi Qarýly Kúshterdiń komandalyq-basqarý organdary men áskerı bólimderiniń, Shekara qyzmetiniń, Ulttyq ulannyń, Tótenshe jaǵdaılar mınıstrliginiń, sondaı-aq jergilikti atqarýshy, arnaıy memlekettik jáne quqyq qorǵaý organdarynyń ózara is-qımyly tekserildi.

Alty oblysta soǵys jaǵdaıy engizilgen kezderdegi Oblystardyń qorǵanys keńesteriniń jumysty uıymdastyrýy tekserildi.

Jeti oqý-jattyǵý polıgonynda áskerler soǵystyń jańa formalary men ádisterin, qurlyqta jáne áýedegi jaýǵa qarsy turý máselelerin pysyqtady, sonymen qatar Kaspıı teńiziniń sý aıdynynda desantqa qarsy jattyǵý operatsııasyn júrgizdi.

Jańadan alynǵan qarý-jaraq pen áskerı tehnıkanyń, sonyń ishinde Sý-30SM ushaqtary, Mı-35 tikushaqtary, jańa ushqyshsyz ushý apparattary, áýe shabýylyna qarsy qorǵanys júıeleri men radıoelektrondy kúres júıeleriniń jaýyngerlik qasıetteri synaldy.




Joǵary qaraı