Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Memleket basshysy bıznesmenderdi Jańa Qazaqstandy birge qurýǵa shaqyrdy

2022 jyldyń 19 mamyr 2022 19:25

NUR-SULTAN. QazAqparat – Memleket basshysy Qasym-Jomart Toqaev bıznes ókilderin Jańa Qazaqstandy birge qurýǵa shaqyrdy, dep habarlaıdy QazAqparat tilshisi.

«Kásipkerler tarapynan memleket saıasatynyń boljap bilý múmkin emestigi jáne únemi ózgerip turatyny týraly oryndy syn jıi aıtylady. Ótken jolǵy kezdesýde men jańa ekonomıkalyq saıasat ázirleýdi tapsyrǵanmyn. Bul jumys tabysty júrip jatyr deýge kelmeıdi. Tyń oılardyń tapshylyǵyn baıqap otyrmyz. Munyń daǵdarysqa qarsy sharalarǵa da qatysy bar. Blogosferada belsendi bolyp, synı eskertýler aıtyp júrgen kásipkerler men ekonomısterdi shaqyryp, Úkimet janynan jumys tobyn qurýdy tapsyrdym. Biraq ondaı adamdar da uzaqqa barmady. Maǵan jetken málimet boıynsha, olar da naqty usynystar men ıdeıaǵa kelgen kezde qınalyp qalǵan. Degenmen Úkimet pen Prezıdent ákimshiliginen makro, salyq, bıýdjet, aqsha-kredıt sııaqty ekonomıkanyń barlyq túrin qamtıtyn doktrınalyq qujat kútemin», - dedi Memleket basshysy Aqordada ótken kezdesýde.

Prezıdent Reformalar jónindegi joǵary ekonomıkalyq keńestiń otyrysynda uıym jumysyn kúsheıtý týraly tapsyrma bergenin eske saldy.

«Bul jumysty bıznestiń konstrýktıvti qatysýy arqyly júrgizgen jón. Óıtkeni sonda ǵana qajetti ári tıimdi reforma jasaı alamyz. Osynda otyrǵandardyń bárine aıtamyn: «Jańa Qazaqstandy birge quraıyq» degen uran – bos sóz emes. Kásipkerlerdiń, ekonomıkadaǵy naqty sektor ókilderiniń bul iske qatysýy óte mańyzdy», - dedi Qasym-Jomart Toqaev.

Prezıdenttiń aıtýynsha, salyq saıasaty men ony ákimshilendirý isine erekshe nazar aýdarý qajet.

«Bul salada búginde belgili bir teńgerimsizdik baıqalady. Mysaly, keıbir iri kompanııalar qoldanysta salyq rejımi boıynsha shaǵyn kásiporyndar deńgeıinde salyq tólep, qýlyǵyn asyryp júr. Naqty kózdelgen yntalandyrý sharalarynyń ornyna tutas bıznes toptary men qyzmet túrlerin salyqtan bosatý manıpýlıatsııa quralyna aınalyp otyr. Bıýdjetti qarjydan aıyryp qana qoımaı, qoǵamnyń jikke bólinýine ákeletin, ulttyq ıgilikterdi úlestirýdegi ádildikti tómendetetin qaıshylyqtardy retteý joldaryn oılastyrý qajet. Memleket pen bıznes bul másele boıynsha bir toqtamǵa kelgennen keıin salyq zańnamasyn turaqtandyryp, kezdeısoq ózgerister tájirıbesin toqtatý qajet. Úkimetke bıznes-qaýymdastyqpen birlesip, salyq saıasatynyń uzaq merzimdi tujyrymdamasyn ázirleýdi tapsyramyn. Qujatta eldegi salyq salýdyń negizgi tásilderi kórinis tabýǵa tıis. Salyq saıasatynyń negizgi ólshemsharttary turaqty bolýy kerek. Tsıfrlandyrý esebinen salyq tóleý protsesterin ońaılatýǵa, adamı faktordy alyp tastaı otyryp, ákimshilendirýge erekshe nazar aýdarý kerek. Bul jumysty búgingi jáne bolashaq ahýalǵa, ulttyq mindetterge súıene otyryp, muqııat júrgizý kerek. Kelesi jyldyń basynda Úkimetten salmaqty usynystar kútemin», - dedi Memleket basshysy.

Aıta keteıik, Qasym-Jomart Toqaev búgin Aqordada otandyq bıznes ókilderimen kezdesti.


Joǵary qaraı