Aýa raıy
Astana -12 °S
Almaty -2 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy Asqar Mamındi qabyldady

2020 jyldyń 26 qazan 2020 18:12

NUR-SULTAN. QazAqparat - Memleket basshysy Qasym-Jomart Toqaev Premer-Mınıstr Asqar Mamındi qabyldady, dep habarlaıdy Aqorda.

Prezıdentke sanıtarlyq-epıdemıologııalyq jaǵdaıdy turaqtandyrý úshin qabyldanyp jatqan sharalar jáne elimizdiń áleýmettik-ekonomıkalyq damýynyń ózekti máseleleri týraly baıandaldy.

Asqar Mamın Prezıdentke elimizdegi sanıtarlyq-epıdemıologııalyq jaǵdaıdyń baqylaýda ekenin jetkizdi. Sondaı-aq koronavırýs indetiniń jańa tolqynyna daıyndyq jumystary aıasynda júzege asyrylyp jatqan sharalar týraly málimet berildi.

Atap aıtqanda medıtsınalyq uıymdar men halyqty dári-dármekpen qamtamasyz etý, emdeý nysandaryna jasandy tynys berý apparattary men ottegi kontsentrattaryn jetkizý, aımaqtardy jyljymaly dıagnostıkalyq keshendermen, tsıfrlyq rentgen-apparattarmen, mobıldi toptarmen jáne jedel medıtsınalyq kómek kórsetý kólikterimen jabdyqtaý jumystary júrgizilýde.

Qazirgi ýaqytta 13 aımaqtyń 10-ynda modýldik juqpaly aýrýhanalardyń qurylysy aıaqtalǵan, qalǵan 3 nysan osy jyldyń qarasha aıynyń sońyna deıin paıdalanýǵa beriledi.

Memleket basshysyna respýblıkalyq jáne aımaqtyq turaqtandyrý qorlarynyń qurylǵany jáne densaýlyq saqtaý júıesine arnalǵan 91 túrli dári-dármek pen jeke qorǵanysh quraldarynyń eki aılyq qory jasaqtalǵany týraly aıtyldy.

Dári-dármek tapshylyǵyn boldyrmaý úshin dárihanalardyń bólshek saýda júıesinde suranysqa ıe 33-ten astam preparat qory qosymsha jasaqtalýda.

Asqar Mamın Qasym-Jomart Toqaevqa PTR test synamalaryn alý kólemin arttyrý jumystary týraly da málimet berdi. Onyń aıtýynsha, zerthanalar sany 124-ke deıin kóbeıip, testileý qýaty táýligine 66 myńǵa deıin jetti. Bul rette, turǵyndardy test synamalarymen qamtý 2,5 ese ulǵaıtylyp, PTR test synamalaryn alý quny tómendetildi.

Budan bólek, Asqar Mamın Prezıdentke shekaralyq ótkizý beketterinde, sondaı-aq, kóliktiń barlyq túrleri men ınfraqurylymdarynda sanıtarlyq-epıdemıologııalyq baqylaýdyń kúsheıtilgeni týraly baıandady.

Sonymen qatar óńirlerdegi bıznes sýbektileriniń jumysy birtindep qaıta qalpyna keltirilýde. Osy rette, aımaqta vırýs juqtyrý ósiminiń tirkelmeýi, turaqty epıdemıologııalyq ahýaldyń «jasyl» deńgeıde bolýy eskeriledi.

Premer-Mınıstr Memleket basshysyna kásipkerlerdi qoldaý, shetelden ınvestıtsııa tartý, jumyspen qamtý isin damytý jáne elimizdi áleýmettik-ekonomıkalyq turǵydan órkendetýdiń basqa da ózekti máseleleri jóninde qabyldanǵan sharalar týraly baıandady.

Prezıdent koronavırýs pandemııasynyń aldaǵy aılardaǵy taralýyna qatysty Dúnıejúzilik densaýlyq saqtaý uıymynyń pessımıstik boljamdaryn eskerip, Úkimet belgilegen jospardyń múltiksiz oryndalýynyń mańyzdy ekenin atap ótti.

Karantındi kúsheıtý jónindegi qatań sharalardy kásipkerlerdiń múddelerin jáne jalpy elimizdiń ekonomıkalyq damýyn eskere otyryp qabyldaǵan jón.


Joǵary qaraı