Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Mektepterdi avtobýspen qamtýǵa tek otandyq kásiporyndar tartylady

2021 jyldyń 29 maýsym 2021 11:57

NUR-SULTAN. QazAqparat – Otandyq óndirýshiler el óńirlerine qajetti mólsherde mektep avtobýstarymen qamtamasyz etýge daıyn. Bul týraly QR Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda aıtty, dep habarlaıdy QazAqparat tilshisi.

«Indýstrııa jáne ınfraqurylymdyq damý mınıstrligi Bilim mınıstrligimen birlesip, mektepterdegi balalardy tasymaldaýǵa arnalǵan avtobýstarmen qamtamasyz etý jónindegi tıisti Jol kartasyn bekitti. Búgingi kúni 515 mektep avtobýsy qajet, onyń ishinde 20 oryndyq 347 avtobýs jáne 40 oryndyq 168 avtobýs kerek», - dedi B. Atamqulov jıynda.

Mınıstrdiń aıtýynsha, balalardy, onyń ishinde tirek-qımyl fýnktsııalary buzylǵan balalardy tasymaldaýda jabdyqtalǵan kólik quraldaryna qoıylatyn tehnıkalyq talaptar aıqyndaldy.

«Olar – balalarǵa arnalǵan 4 núkteli qaýipsizdik beldigi bar oryndyqtar, balalardy salonda qaldyryp ketpeý úshin aldyn alý júıesi, apattyq jaǵdaıda salonnyń artqy esiginen bir ret basý arqyly shyǵýy, sanıtarlyq-epıdemıologııalyq qondyrǵylar jáne júıeler men agregattar toraptarynyń qaýipsizdigin ıntellektýaldy avtomatty tekserý jáne taǵy basqa tehnıkalyq talaptar aıqyndaldy», - deıdi B. Atamqulov.

Sondaı-aq, mektepterdi avtobýstarmen qamtamasyz etý úshin tek otandyq kásiporyndar tartylady, olar – «QazTechna» JShS Yutong markaly 20 oryndyq 287 avtobýs, «DaewooBusKazakhstan» JShS PAZ markaly 20 oryndyq 60 avtobýs jáne «HyundaiTransAuto» JShS Golden Dragon 40 oryndyq 168 avtobýs.

Ónerkásipti damytý qory arqyly avtobýstardy lızıngke satyp alý úshin tıisti qarajat bıyl 22 mlrd teńge kóleminde kózdelgen.

«Budan basqa, jergilikti atqarýshy organdar bıýdjetine júktemeni tómendetý úshin avtobýstardy lızıngtik qarjylandyrý sharttaryna avanstyq tólemdi 15% paıyzdan 0% paıyzǵa deıin tómendetý bóliginde ózgerister engizildi. Osylaısha, mektepterdi avtobýstarmen jabdyqtaý rásimderin aıaqtaý úshin eń aldymen Qarjy mınıstrligi respýblıkalyq bıýdjetti qalyptastyrý kezinde jergilikti atqarýshy organdardyń oblystyq bıýdjetterinde 2022 jyldan bastap lızıngtik tólemderdi óteý úshin nysanaly transfertter kózdesin.

Ekinshi, jergilikti atqarýshy organdar bıylǵy tamyz aıynda mektep avtobýstaryn satyp alýǵa konkýrstar jarııalaýy qajet. Óz kezeginde, otandyq óndirýshiler el óńirlerine qajetti mólsherde mektep avtobýstaryn ýaqytyly jetkizýdi qamtamasyz etýge daıyn», - dedi mınıstr.


Joǵary qaraı