Aýa raıy
Astana 12 °S
Almaty 13 °S
valıýta baǵamy
USD 421.58
EUR 496.83
RUB 5.53
CNY 62.20

Mekteptegi tamaqtanýdy memlekettik satyp alý protsesi avtomattandyryldy – ákimdik

2020 jyldyń 9 tamyz 2020 05:00

NUR-SULTAN. QazAqparat - Elorda ákimdiginde qala ákiminiń tóraǵalyǵymen sybaılas jemqorlyqqa qarsy is-qımyl boıynsha onlaın-otyrys ótti, dep habarlaıdy QazAqparat tilshisi.

Jıyn barysynda elorda ákimi Altaı Kólginov zańnamany buljytpaı saqtaý jáne kez kelgen sybaılas jemqorlyq táýekelderin boldyrmaý kerektigin atap ótti.

«Ákimdik áleýmettik turǵyn úı, áleýmettik nysandar, jol salý, aýlalar men qoǵamdyq keńistikterdi abattandyrý, kógaldandyrý jáne t.b. sııaqty birqatar mańyzdy baǵdarlamalardy júzege asyrýda kez kelgen sybaılas jemqorlyq táýekelderin boldyrmaý qajet. Quqyq buzýshylyqtyń kez kelgen túrine múldem tózbeýshilik qaǵıdaty bolýy tıis. Mysaly, ata-analar tarapynan da, bıznes tarapynan da mektep tamaǵyna memlekettik satyp alýdy ótkizýdiń ashyq emestigi týraly shaǵymdar tústi. «Astana adaldyq alańy» sybaılas jemqorlyqqa qarsy is-qımyl agenttigimen, Bilim jáne ǵylym mınıstrligimen birlesip, osy máseleni zerdelegen bolatyn. Osylaısha, mekteptegi tamaqtanýdy memlekettik satyp alý protsesi avtomattandyrylyp, tamaqtaný salasy elektrondy formatqa kóshirildi. Osylaısha adamı faktor joıyldy. Sondaı-aq qoǵamdyq baqylaýshylar da protseske qatysady. Barlyq shaǵymdarǵa «halyq únine qulaq asatyn memleket» qaǵıdaty boıynsha jedel den qoıý kerek», - dedi elorda ákimi Altaı Kólginov.

Memleket basshysynyń tapsyrmasyn oryndaý sheńberinde memlekettik jáne kvazımemlekettik sektordyń ónimsiz shyǵystaryn qysqartý boıynsha jumys júrgizildi. Ákimdiktiń jergilikti bıýdjetin ońtaılandyrý 35 mlrd teńgeni qurady. Únemdelgen qarajat áleýmettik salaǵa baǵyttalǵan. Ekonomıkanyń naqty sektoryn jáne ınfraqurylymdy qoldaýǵa 16 mlrd teńgeden astam qarjy bólindi. Bul qarjy apatty úılerdi buzýǵa, joldar, aýlalar, ınjenerlik-kommýnıkatsııalyq ınfraqurylym salýǵa jumsalady.

Bilim berý, densaýlyq saqtaý jáne áleýmettik kómek júıesin damytýǵa 7 mlrd.teńge: balabaqshalardan qosymsha oryndar, medıtsınalyq jabdyqtar satyp alý, az qamtylǵan sanattaǵy azamattarǵa áleýmettik kómek kólemin ulǵaıtýǵa baǵyttaldy. ShOB-ti qoldaýǵa – 5 mlrd teńgeden astam qarjy baǵyttaldy. Bul qarjy áleýmettik mańyzy bar azyq-túlik ónimderiniń baǵasyn ustap turý úshin nesıeler boıynsha paıyzdyq mólsherlemeni sýbsıdııalaýǵa bólinedi. Ońtaılandyrý barysynda birqatar kásiporyndar taratylyp, senimgerlik basqarýǵa berildi, vedomstvolyq baǵynysty uıymdardyń basshylyq quramy qysqartyldy jáne t.b. Bul jumystar aldaǵy ýaqytta da jalǵasyn tabatyn bolady.



Basty sózder: Nur-Sultan, Zań,
Joǵary qaraı