Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Májiliste kúrish salasyndaǵy dıqandardyń máseleleri kóterildi

2021 jyldyń 27 qazan 2021 13:31

NUR-SULTAN. QazAqparat – Májilistiń jalpy otyrysynda depýtat Berik Dúısenbınov kúrish salasymen aınalysatyn dıqandardyń máselelerin kóterdi, dep habarlaıdy QazAqparat tilshisi.

«Osy jyldyń naýryz aıynda «Aq jol» fraktsııasynyń depýtattary Qazaqstan Respýblıkasynyń Ekologııa, geologııa jáne tabıǵı resýrstar mınıstriniń atyna sý tapshylyǵyna baılanysty elimizdegi kúrish alqaptaryn 29 myń gektarǵa azaıtý týraly málimdemesine túsindirme berýin surap saýal joldaǵan bolatyn. Mınıstrdiń bergen mardymsyz jaýabyna jáne jaqynda Aqjol partııasyna kelip túsken Almaty oblysynyń Balqash, Eskeldi aýdanynyń kúrishshi dıqandarynyń hattaryna oraı búgin qaıta saýal joldaýǵa májbúrmiz. Bir ǵasyrǵa jýyq tarıhy bar, aǵa býynnyń mańdaı terimen sýarylǵan, ashtyq pen soǵys jyldarynda elge talǵajaý bolǵan, keshegi daǵdarys ýaqytynda aýyldardyń tiregi bolǵan «aq altynymyz», búginde qazaq eliniń «Aq marjan» brendine aınalǵan. Kúrish egetin úsh oblysty qosqanda bir mıllıonǵa jýyq azamatqa jumys berip otyrǵan kúrish salasynyń eshqandaı ǵylymı zertteýsiz, bir paraqqa sııatyn buıryqpen sizder qalaı úshten bir bóligin qysqartpaqsyzdar?! Kúrish alqaby, joǵaryda aıtylǵandaı, qysqarsa, orta eseppen úsh júz myńǵa tarta adam jumyssyz qalmaqshy, olardyń januıasyn qalaı asyraısyzdar?! Álde, olar da áleýmettik kómektiń kezegine tura ma ?!», - dedi B. Dúısenbınov QR Premer-Mınıstriniń orynbasary Roman Sklıardyń atyna joldaǵan saýalynda.

Onyń aıtýynsha, azyq-túliktiń qymbattaýy, pandemııa, ekonomıkalyq daǵdarystar kezinde elimizdegi árbir kásiporynnyń, jumys ornynyń, ásirese, aýyldaǵy kúnkóristiń mańyzy óte zor. Tipten jańa jumys ornyn ashý úshin memleketimiz mıllıardtaǵan qarjy jumsaýda.


«Olaı bolsa, ǵasyrlyq tarıhy bar, áleýmettik, ekonomıkalyq quny baǵa jetpes sala týraly tereń oılanyp, elmen, mamandarmen aqyldasyp baryp, salmaqty ári ashyq sheshim nege qabyldamaısyzdar?! Almaty oblysynyń kúrishshilerinen kelgen hatqa súıensek, olar kúrishti tek tabys tabý úshin ǵana emes, týǵan jerleriniń shólge, tuzǵa aınalmaýy úshin ekologııalyq maqsatta egip otyr. Elimizdiń ekologııasyna jaýapty memlekettik organ bul máselemen tanys dep oılaımyz. Bıyl qatty qýańshylyq bolyp, Syr elinde, Túrkistan men Almaty oblysynyń shóleıt aýdandarynda malǵa jem-shóp bolyp otyrǵan da kúrishtiń arqasynda sý ishken kúrmek shóp pen kúrishtiń sabany, ıaǵnı, kúrish egilmese, mal da azyqsyz qalatyn edi. Bizdiń quzyretti memlekettik organdar sýdyń tapshylyǵyn tek qana egistik alqapty qysqartýdan ǵana emes, Іle men Darııanyń, Jaıyq pen Ertistiń basynda otyrǵan kórshilerimizden jáne sýdy únemdi paıdalanýdyń zamanaýı tehnologısyn qoldanýdan izdeý kerek», - dedi depýtat.

Joǵaryda baıandalǵandardy eskere otyryp, «Aqjol» fraktsııasy tıisti saýaldardy joldady.

«Bolashaqta elimizdiń ekonomıkasynda kúrish salasy bola ma, joq pa? Eger kúrish óndirisi saqtalyp, sý kanaldaryn, ınjenerlik drenajdy júıeni qalpyna keltirý jumystary bastalsa, osy júıeni bolashaqta ózderi paıdalanatyn dıqandardyń ózin jumysqa tartýdy josparlap otyrsyzdar ma? Al endi kúrish alqaptary qysqartylsa, jumyssyz qalǵan joǵarǵy deńgeıli mamandardy basqa salaǵa, basqa kásippen aınalysýǵa, mysaly, mal sharýashylyǵyna beıimdeý qarastyrylǵan ba? Olaı bolsa, qysqy merzimdi paıdalanyp, olardy qaıta oqytyp, kóktemge qaraı jańa daqyl tuqymymen nemese analyq mal basymen qamtý múmkindigi bola ma? Eger joǵaryda aıtylǵan máseleler sheshilmese, sarapshylardyń paıymdaýynsha, úsh júz myńǵa jýyq azamattarymyz jumyssyz qalý qaýpi bar. Bul azamattarymyzdyń kópshiligi qalaǵa keleri sózsiz, aýyl otasylary kópbalaly, olardy mekteppen, baspanamen, jumyspen qamtýǵa daıynsyzdar ma?», - dedi Berik Dúısenbınov.


Joǵary qaraı