Májiliste qarjy pıramıdasymen kúreske arnalǵan qujat qaralady
NUR-SULTAN. QazAqparat – Májilis depýtattarynyń qaraýyna «Qazaqstan Respýblıkasynyń keıbir zańnamalyq aktilerine qarjy naryǵy men qarjy uıymdaryn memlekettik retteýdi, baqylaý men qadaǵalaýdy kúsheıtý jáne qarjylyq pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» zań jobasy engizildi, dep habarlaıdy QazAqparat tilshisi.
«Atalǵan zań jobasy Parlament Májilisi depýtattarynyń bastamasymen Memleket basshysynyń qarjy pıramıdalaryna qarsy is-qımyl jónindegi tapsyrmalaryn iske asyrý maqsatynda ázirlendi. Qujattyń negizgi maqsaty - azamattar múlkiniń qorǵalaýyn arttyrý jáne qarjy pıramıdasynyń bastapqy satysyndaǵy qyzmetiniń jolyn kesý. Qarjy jáne bıýdjet komıteti zań jobasy boıynsha 2022 jylǵy 16 qarashaǵa deıin qorytyndy ázirleýge daıyn», - dedi Májilistiń Qarjy jáne bıýdjet komıtetiniń tóraǵasy Marat Qusaıynov palatanyń jalpy otyrysynda.
Aıta keteıik, buǵan deıin depýtattar qarjy pıramıdasyn jarnamalaýshylardy jaýapqa tartýdy usynǵan bolatyn.
