Aýa raıy
Astana -18 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Májilis pen máslıhattar saılaýyn ótkizýge qansha qarjy jumsalady

2020 jyldyń 21 qazan 2020 16:14

NUR-SULTAN. QazAqparat – Ortalyq saılaý komıssııasynyń hatshysy Sábıla Mustafına Májilis pen máslıhattar saılaýyn biriktirip ótkizýge qansha qarjy bólinetinin aıtty. Onyń sózine qaraǵanda, QR Parlamenti Májilisi men máslıhat depýtattarynyń birikken saılaý naýqanyna shyǵystardyń boljamdy smetasy 15,3 mlrd teńgeni quraıdy. Al eger eki saılaýdy biriktirmeı bólek ótkizse, shyǵystar smetasy 25 mlrd. teńgeni bolatyn edi, dep habarlaıdy QazAqparat tilshisi.

Onyń sózine qaraǵanda, eki naýqan da turaqty jáne konstıtýtsııalyq merzimderge sáıkes keledi. OSK olardyń josparly sıpatyn eskere otyryp, 2020 jylǵy respýblıkalyq bıýdjetti naqtylaý aıasynda saılaýdy ótkizýge arnalǵan shyǵystardyń boljamdy smetasyn ázirlep, Úkimetke usyndy.

«2020 jylǵa arnalǵan shyǵystardyń boljamdy smetasy 10,8 mlrd teńgeni qurady. Bul shyǵystardyń negizgi úlesi 10 061 saılaý komıssııasynyń 70681 múshesiniń eńbekaqysyna tıesili, ıaǵnı bul soma 7,3 mlrd teńge nemese 68 paıyzy. Qalǵan 3,5 mlrd teńge nemese 32 paıyzy saılaý komıssııalarynyń uıymdastyrý shyǵystaryna josparlanǵan. Osy oraıda bıýlletenderdi, polıgrafııalyq jáne basqa da ónimderdi daıyndaý, saılaý protsesiniń jarııalylyǵy men ashyqtyǵyn qamtamasyz etý maqsatynda saılaý naýqanyn aqparattyq súıemeldeý, saılaý komıssııalary úshin qajetti materıaldyq-tehnıkalyq jaǵdaılar jasaý eskerilgen», - dedi S. Mustafına.

Onyń aıtýynsha, pandemııa jaǵdaıynda barlyq karantındik sharalardy saqtaı otyryp, naýqan júrgiziledi. Sondyqtan saılaý komıssııalarynyń múshelerin jeke qorǵanysh quraldarymen qamtamasyz etýge 341,4 mln teńge somasynda shyǵyndar kózdelgen.

«2016 jylǵy Parlament Májilisiniń ótken saılaý naýqandarymen jáne 2019 jylǵy prezıdenttik saılaýmen salystyrǵanda aldaǵy naýqanǵa arnalǵan shyǵystar ósti. Birinshi kezekte, shyǵystar kóleminiń artýy saılaý komıssııalary músheleriniń eńbegine aqy tóleý jónindegi shyǵystardyń ulǵaıýyna áser etken jalaqynyń eń tómengi mólsheriniń artýymen baılanysty. Ekinshiden, halyqtyń tabıǵı ósýine baılanysty jańadan qurylǵan 86 saılaý ýchaskesine, jańa ýchaskelik saılaý komıssııalarynyń quramynda 600-den astam múshege jumsalatyn shyǵyndar ulǵaıdy. Úshinshiden, taýarlar, jumystar men qyzmetter baǵasynyń ınflıatsııasy, sondaı-aq pandemııa jaǵdaıynda saılaý ótkizýge baılanysty mindetti shyǵystar ósýdiń obektıvti faktorlary bolyp otyr», - dedi ol.

Sonymen qatar S. Mustafına naýqan eki bıýdjettik jyl aıasynda ótetinin atap ótti.

2021 jylǵa arnalǵan shyǵystar «2021-2023 jyldarǵa arnalǵan respýblıkalyq bıýdjet týraly» zań jobasynda 4,5 mlrd teńge somasynda kózdelgen jáne bul somanyń barlyǵy derlik saılaý komıssııalary músheleriniń eńbegine aqy tóleýge jumsalady.

«Osylaısha, tutastaı alǵanda, QR Parlamenti Májilisi men máslıhattary depýtattarynyń birikken saılaý naýqanyna shyǵystardyń boljamdy smetasy 15,3 mlrd teńgeni quraıdy. Bul bıýdjet qarajatyn tıimdi paıdalaný jónindegi utymdy sheshim bolyp sanalady. ıAǵnı, saılaý naýqanyn bólek ótkizgen kezde shyǵystar smetasy 25 mlrd. teńgeni quraıtyn edi», - dedi OSK hatshysy.


Aıta keteıik, búgin Memleket basshysy Qasym-Jomart Toqaev QR Parlamenti Májilisi jáne máslıhat depýtattary saılaýyn taǵaıyndaý týraly úndeý jarııalady.

«Búgin men Parlament Májilisi depýtattarynyń saılaýyn taǵaıyndaý týraly Jarlyqqa qol qoıdym. Ortalyq saılaý komıssııasynyń qaýlysymen barlyq deńgeıdegi máslıhat depýtattarynyń saılaýy taǵaıyndalady. Aldaǵy saılaý konstıtýtsııalyq merzimge sáıkes, 2021 jyldyń 10 qańtarynda ótedi. Barlyq saıası partııalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partııalyq ınfraqurylymdardy jetildirýine ýaqyty jetkilikti boldy. Ortalyq saılaý komıssııasy men Bas prokýratýra saılaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady», - dedi Prezıdent.


Joǵary qaraı