Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Máýlen Áshimbaev: Aldaǵy úshjyldyq bıýdjet – Úkimet úshin úlken synaq

2021 jyldyń 18 qarasha 2021 13:00

NUR-SULTAN. QazAqparat - Aldaǵy úshjyldyq bıýdjetti Úkimet úshin úlken synaq deýge bolady. Bul týraly QR Parlamenti Senatynyń tóraǵasy Máýlen Áshimbaev aıtty, dep habarlaıdy QazAqparat tilshisi.

«Biz Ulttyq qordan kepildendirilgen transfert týraly jáne 2022-2024 jyldarǵa arnalǵan respýblıkalyq bıýdjet týraly zań jobalaryn qaradyq. Buǵan deıin Senattyń turaqty komıtetteri kirister men shyǵystardyń barlyq baptaryn muqııat zerdelep, Úkimet ókilderimen birge talqylady. Búgingi otyrysta da bul máselelerdi jan- jaqty qarap, tıisti sheshimder qabyldadyq. Jalpy aldaǵy úsh jylǵa arnalǵan bıýdjet elimizdiń damýyndaǵy basymdyqtardy qamtamasyz etýge baǵyttalǵan. Sońǵy jyldary Qazaqstanda pandemııa saldaryn eńserýge basymdyq berilgeni belgili», - dedi Máýlen Áshimbaev Senattyń jalpy otyrysynda.

Onyń atap ótýinshe, Memleket basshysynyń tapsyrmasymen azamattarymyz ben zardap shekken kásiporyndarǵa qoldaý kórsetýge qomaqty qarajat jumsalýda.

«Jaǵdaı áli de bolsa ońaı emes. Biraq, jalpy Qazaqstan pandemııa daǵdarysyn eńserip keledi dep aıtýǵa bolady. Sondyqtan aldaǵy úsh jyldyń bıýdjeti negizinen qaıta qalypqa kelýge jáne damýǵa baǵyttalyp otyr. Bıylǵy Prezıdentimizdiń Joldaýynda pandemııadan keıingi kezeńde ekonomıkany qalpyna keltirýdiń naqty mindetteri belgilendi. Ónerkásiptiń tıimdiligin arttyrýǵa, óńirlerdi damytýǵa, halyqty alańdatqan ózekti áleýmettik máselelerdi sheshýge qatysty da maqsat-mindetter aıqyndaldy. Prezıdentimizdiń tapsyrmasyna sáıkes, jańa Memlekettik josparlaý júıesi aıasynda 10 Ulttyq joba ázirlenip, bekitildi. Olar ekonomıkanyń ósýine jáne azamattarymyzdyń ómir súrý sapasyn jaqsartýǵa arnalǵan», - dedi Senat Spıkeri.

Joǵary palata tóraǵasy búgin qaralǵan úsh jyldyq bıýdjette sol jobalardy iske asyrý úshin tıisti qarajat bólinip otyrǵanyn atap ótti.

Sondyqtan ár teńgeni oryndy paıdalanyp, memleket qarjysynyń tıimdiligin arttyrý asa mańyzdy ekendigin basa aıtty.

«Jalpy, aldaǵy úshjyldyq bıýdjetti Úkimet úshin úlken synaq deýge bolady. Sebebi, Úkimet ekonomıkany damytý qarqynyn arttyrý jáne kóleńkeli sektordy azaıtý arqyly bıýdjettiń kirisin 35 paıyzǵa ósirýdi kózdep otyr. Sonymen birge bıýdjet tapshylyǵyn kezeń-kezeńimen tómendetý jáne Ulttyq qordan bólinetin transfertter kólemin qysqartý josparlanǵan. Bul máseleni Senat depýtattary buǵan deıin de kótergen bolatyn. Búgin Úkimettiń osy baǵyttaǵy belsendiligin baıqap otyrmyz. Osyndaı bastamalardy biz, árıne, qoldaımyz. Soǵan qaramastan memlekettiń barlyq áleýmettik mindettemeleri tolyǵymen oryndala beredi», - dedi Máýlen Áshimbaev.


Joǵary qaraı