Aýa raıy
Astana -13 °S
Almaty -10 °S
valıýta baǵamy
USD 421.58
EUR 496.83
RUB 5.53
CNY 62.20

Máslıhat depýtattyǵyna kandıdattardy usyný 10 qarasha bastalady

2020 jyldyń 21 qazan 2020 17:42

NUR-SULTAN. QazAqparat – Búgin Ortalyq saılaý komıssııanyń otyrysynda OSK tóraǵasynyń orynbasary Konstantın Petrov máslıhattar depýtattarynyń kezekti saılaýy týraly túsinik berdi, dep habarlaıdy QazAqparat tilshisi.

Onyń aıtýynsha, barlyq deńgeıdegi máslıhattar depýtattarynyń kezekti saılaýy bir mezgilde ótkiziledi jáne merzimi jaǵynan Prezıdentti, Parlament Senaty depýtattaryn saılaýmen tuspa-tus kelmeýge tıis.

Máslıhattar depýtattaryn saılaýdy QR Parlamenti Májilisi depýtattaryn saılaýmen bir mezgilde ótkizý boıynsha shekteýler joq.

«Osyǵan baılanysty máslıhattar depýtattarynyń kezekti saılaýyn 2021 jylǵy 10 qańtarǵa taǵaıyndaý usynyldy.

Májilis depýtattary men máslıhat depýtattaryn saılaýdy birge ótkizý qoldanystaǵy zańnamaǵa qaıshy kelmeıdi jáne qazirgi jaǵdaıda obektıvti negizdelgen sheshim bolyp otyr. Biriktirilgen naýqan - bul bıýdjetti únemdeý jáne pandemııa jaǵdaıynda áleýmettik baılanystardy azaıtý», - dedi OSK tóraǵasynyń orynbasary.

Jalpy, aldaǵy naýqanda 216 máslıhattyń 3276 depýtaty saılanýǵa tıis. Osy oraıda oblystardyń, Nur-Sultan, Almaty jáne Shymkent qalalary máslıhattarynyń 589 depýtaty, oblystyq mańyzy bar qalalardyń 36 máslıhatynda 596 depýtat, aýdandardyń 163 máslıhatynda 2091 depýtat qamtylmaq.

Sonymen qatar Ortsaılaýkom múshesi Erlan Daýylbaev Qazaqstan Respýblıkasy máslıhattary depýtattarynyń kezekti saılaýyn ázirleý sharalary týraly baıandady.

Ol óz sózinde máslıhattar depýtattaryn saılaý boıynsha aldaǵy saılaý naýqanynyń birqatar erekshelikteri bar ekenin atap ótti. Birinshiden, máslıhatqa saılaý alǵash ret saıası partııalardyń partııalyq tizimderi boıynsha ótýde. Ekinshiden, saılaý týraly Konstıtýtsııalyq zańdaǵy ózgeristerge sáıkes, tıisti ákimshilik-aýmaqtyq birliktiń aýmaǵynda máslıhattar depýtattaryn saılaý kezinde biryńǵaı aýmaqtyq saılaý okrýgi qurylady.

Máslıhat depýtaty bolyp jıyrma jasqa tolǵan Qazaqstan Respýblıkasynyń azamaty saılana alady. Respýblıka azamaty bir máslıhattyń ǵana depýtaty bola alady.

Osyǵan sáıkes depýtattyqqa kandıdattardy usyný kezeńi 2020 jylǵy 10 qarashadan bastap 2020 jylǵy 4 jeltoqsanda jergilikti ýaqyt boıynsha saǵat 18:00-ge deıin jalǵasady.

Máslıhattar depýtattyǵyna kandıdattardy tirkeý 2020 jylǵy 10 jeltoqsanda jergilikti ýaqyt boıynsha saǵat 18:00-de aıaqtalady.

Saılaý aldyndaǵy úgit-nasıhat 2020 jylǵy 10 jeltoqsanda jergilikti ýaqytpen saǵat 18.00-den keıin bastalady jáne 2021 jylǵy 9 qańtarda aıaqtalady.

Budan buryn habarlanǵandaı, Ortalyq saılaý komıssııasynyń tóraǵasy Berik Imashev aldaǵy máslıhattar depýtattarynyń kezekti saılaýyna qatysty pikir bildirdi.


Joǵary qaraı