Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Mashına jasaıtyn zaýyttyń qysqarǵan jumysshylary arada birneshe aı ótkende aılyǵyn aldy

2021 jyldyń 24 qarasha 2021 01:29

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov «Azııa Avto» kompanııasy qyzmetkerleriniń jalaqy qaryzy ótelgenin málimdedi, dep habarlaıdy QazAqparat tilshisi.

Aımaq basshysy «Azııa Avto» kompanııasyna qatysty krızıstik jaǵdaıdy sheshý maqsatynda memlekettik sektor jáne ónerkásiptik kompanııalarmen birlese úshjaqty komıssııa otyrysyn ótkizdi.

«Jergilikti bılik, ónerkásiptik kompanııalar men kásipodaq uıymdarynyń ortaq áreketiniń arqasynda mekeme qyzmetkerleri qysqa merzimde jumyspen qamtamasyz etildi. Bos oryndar jármeńkesi jáne kásiporynnyń eńbek ujymymen kezdesýler ótkizildi. Bank jáne «Azııa Avto» basshylyǵymen ótken keńes barysynda kásiporyn jumysshylarynyń jalaqy boıynsha bereshegi tolyq óteldi», - dedi Danıal Ahmetov.

Onyń aıtýynsha, búginde kásiporynnyń burynǵy qyzmetkerleri «Qazmyrysh», «ÚMZ», «TMK», «Kemont» sııaqty iri kompanııalarda, shaǵyn jáne orta bızneste jumys istep jatyr.

Esterińizge sala ketsek, ótken jyly 1 sáýirde «Azııa Avto» jáne «Azııa Avto Qazaqstan» kompanııalarynyń dánekerleý men kólik shanaǵyn boıaý mindettemesin oryndamaǵany anyqtaldy.

Osy jyldyń qyrkúıek aıynda «Azııa Avto Qazaqstan» kompanııasy basshysynyń ólimine qatysty tergeý bastalǵan edi.


Joǵary qaraı