Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Maqtaaralda Qosman Aıtmuhametovke eskertkish-bıýst ornatyldy

2021 jyldyń 15 qazan 2021 22:55

TÚRKІSTAN. QazAqparat – Túrkistan oblysy Maqtaaral aýdanynda sanaly ǵumyryn elimizdiń kórkeıýine, elordamyz Nur-Sultan qalasynyń qalyptasýyna jáne Túrkistan oblysynyń jandanýyna arnaǵan aptal azamat, memleket qaıratkeri Qosman Aıtmuhametovke eskertkish-bıýst ornatyldy, dep habarlaıdy QazAqparat.

Oblys ákimdiginiń baspasóz qyzmetinen málim etkendeı, eldiń uly ulyqtalǵan is-sharaǵa óńir ákimdigi, Qosman Qaıyrtaıulynyń anasy, baýyrlary, áriptesteri men Maqtaaral aýdanynyń turǵyndary qatysyp, áserli estelikterimen bólisti.

Túrkistan oblysy ákiminiń birinshi orynbasary qyzmetin atqarǵan otanshyl tulǵa byltyr 57 jasqa qaraǵan shaǵynda dúnıeden ozǵan bolatyn.

«Túrkistan oblysyn damytý jolynda aıryqsha eńbek sińirgen ol memlekettik qyzmettiń qaı salasynda bolmasyn ózin isker uıymdastyrýshy, talapshyl basshy retinde kórsete bildi. Biliktiligi men joǵary jaýapkershiliginiń arqasynda árbir istiń kózin taba biletin bastamashyl qasıetterimen búgingi qoǵamnyń damýyna ózindik eńbegin sińirdi. Oblys ákimi Ómirzaq Shókeevtiń senimdi serigi, áriptesi retinde Túrkistan oblysynyń áleýmettik-ekonomıkalyq damýyna, Túrkistan qalasynyń órkendeýine zor úlesin qosty»,- dedi aımaq ákiminiń orynbasary Sáken Qalqamanov.




Qosman Qaıyrtaıuly oblys ortalyǵy Túrkistan qalasyn órkendetýge belsene atsalysty. Sondaı-aq Arys qalasyn qaıta qalpyna keltirý, Maqtaaral aýdanynda topan sýdan zardap shekkken eldi mekenderdiń qaıta boı túzeýi baǵytynda eńbek etti. Tótenshe jaǵdaıdy joıý jónindegi shtabqa basshylyq jasap, qurylystyń sapaly ári ýaqytyly júrýine úles qosty.

Aýyr dertke qaramastan maqtaaraldyqtarmen birge bolyp, syn saǵatta azamattyq, qaısarlyq tanyta bildi. Apat saldarynan buzylǵan, qıraǵan úılerdiń ornyn tazartý, turǵyn úıler salý jumystarynyń basy-qasynda júrdi. Mal-múlik shyǵyndaryn esepteý kezinde de baqylaýdy bosańsytpady. Eldi mekenderdi qaıta qalpyna keltirý jumystaryn uıymdastyrýǵa da ólsheýsiz úles qosty.




Sý tasqynynan zardap shekken Jeńis, Jańaturmys, Dostyq aýyldarynyń turǵyndary qonystanǵan Myrzakenttegi jańa shaǵynaýdanda isker basshynyń qoltańbasy bar.

Osyny eskergen maqtaaraldyqtar men Maqtaaral aýdany ákimdigi tarapynan Myrzakenttegi ortalyq kóshege Qosman Aıtmuhametovtiń esimin berý jóninde respýblıkalyq onomastıkalyq komıssııasyna usynys joldanǵan. Nátıjesinde komıssııa oń sheshim qabyldap, arda azamattyń atyna kóshe berilgen bolatyn. Al 15 qazanda aptal azamattyń aıbarly eskertkish-bıýsti shaǵynaýdandaǵy jańa saıabaqtyń tórine ornatyldy.





Basty sózder: Aımaq, Túrkistan oblysy, Qoǵam, Ákimdik,
Joǵary qaraı