Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Mádenıet jáne sport mınıstri «Qazaqfılm» kınostýdııasynda boldy

2022 jyldyń 29 qańtar 2022 15:35

NUR-SULTAN. QazAqparat – QR Mádenıet jáne sport mınıstri Dáýren Abaev Almaty qalasyna jumys sapary aıasynda Sh.Aımanov atyndaǵy «Qazaqfılm» kınostýdııasynda boldy, dep habarlaıdy QazAqparat tilshisi.

Kınostýdııa baspasóz qyzmetiniń málimetinshe, mınıstrmen kezdesýge QR Mádenıet jáne sport vıtse-mınıstri Nurǵısa Dáýeshov, KSRO halyq ártisi, kınostýdııanyń kórkemdik jetekshisi Asanáli Áshimov, sondaı-aq kınostýdııanyń ákimshilik-sharýashylyq isi jónindegi vıtse-prezıdenti Aıdarhan Ádilbaev, óndiris jónindegi vıtse-prezıdenti Aıdar Batalov, «Qazaqfılm» prezıdentiniń strategııalyq máseleleri boıynsha keńesshisi Álı Sháýkenov jáne basqalary qatysty. Kezdesý barysynda Mádenıet jáne sport mınıstri Dáýren Abaev kınostýdııadaǵy Qazaq kınosynyń mýzeıin aralap, eski kıno kameralar men basqa da quraldar, qoldanylǵan kostıýmder, Sháken Aımanovtyń jınaǵan kollektsııasy men ózi qoldanǵan jeke zattar saqtalǵan ulttyq kıno óneriniń tarıhynan syr shertetin jádigerlermen tanysty.

Sondaı-aq mınıstrge 2021-2023 jyldarǵa josparlanǵan modernızatsııa baǵdarlamasy aıasynda satyp alynǵan zamanaýı túsirilim tehnıkasy – kameralar, jaryq quraldary jáne basqa da jabdyqtar kórsetildi. Kezdesý barysynda «Qazaqfılmniń» basshylary mınıstrge sońǵy eki jylda túsirilgen fılmder týraly jan-jaqty baıandap berip, elimizdiń basty kıno alańynyń búgingi tynys-tirshiligi men alǵa qoıǵan josparlarymen bólisti. Óz sózinde kınostýdııanyń vıtse-prezıdenti Aıdrahan Ádilbaev «Qazaqfılmniń» modernızatsııasy boıynsha egjeı-tegjeı baıandap, qosymsha qarjylandyrý múmkindigin qarastyrý týraly ótinishin bildirdi.

«Qazaqfılm» - elimizdiń brendi. Kınostýdııa eldiń kóńilinen shyǵatyn súbeli týyndylardy túsirýi jáne osy baǵytta jumys isteýimiz kerek», - dedi Dáýren Abaev.

Basqosý sońynda kınostýdııanyń kórkemdik jetekshisi Asanáli Áshimov QR Mádenıet jáne sport mınıstri Dáýren Abaevqa «Qazaqfılmge» kelip, ulttyq kıno óneriniń problemalaryna asa kóńil bólgenine alǵysyn aıtty. Sondaı-aq qazaq kınosynyń abyzy quramyna Oljas Súleımenov, Dýlat Isabekov, Smaǵul Elýbaev syndy basqa da kórnekti qaıratkerler kiretin abyroıly kórkemdik keńes qurýdy usyndy.

Kezdesýden keıin jınalǵandar «Uly dala tańy» tarıhı fılminiń jumys nusqasyn tamashalady. Aıta ketsek, fılmniń rejısseri Aqan Sataev oqshaýlaý rejıminde bolǵandyqtan, kezdesýge qatysa almady. Alaıda, fılmniń kórsetilimine basty róldi somdaǵan akterler – Qazaqstannyń halyq artısi Tuńǵyshbaı Jamanqulov, Qazaqstannyń eńbek sińirgen qaıratkeri Berik Aıtjanov, fılmniń keńesshisi– belgili tarıhshy, professor Bereket Káribaev, kınostýdııanyń Dırektorlar keńesiniń múshesi Armanjan Baıtasov jáne basqa da óner qaıratkerleri qatysty.

Tarıhı kınotýyndyny tamashalaǵan qonaqtar joǵary baǵa berip, fılmniń tartymdy jelisi men basty keıipkerlerdiń rólin somdaǵan akterlerdiń sheberligin atap ótti.


Joǵary qaraı