Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

«Qyzyljar barysy» týrnırinde ákim baq synady

2022 jyldyń 9 mamyr 2022 13:05

PETROPAVL. QazAqparat – Petropavlda qazaq kúresinen «Qyzyljar barysy-2022» oblystyq týrnıri ótti. Otyz balýannyń ishinen bul joly da Muhıt Tursynov top jardy, dep habarlaıdy QazAqparat tilshisi.

Petropavlda bıyl onynshy jyl qatarynan uıymdastyrylyp otyrǵan «Qyzyljar barysy» oblystyq týrnırine óńirdiń kil myqty balýandary jınaldy. Aralarynda qazaq kúresinen álem chempıonatynyń eki dúrkin chempıony, «Qazaqstan barysy-2014» respýblıkalyq týrnıriniń altyn belbeý ıegeri Muhıt Tursynov sekildi kópke tanymal sportshylar da bar. Al Aıdar Qalıjanov Tımırıazev aýdanynan kelgen palýan. 56 jastaǵy azamat osy aýdandaǵy Tselınnoe aýyldyq okrýginde ákim bolyp jumys isteıdi.

«Toǵyzynshy synyptan bastap kúresip júrmin. Jalpy sportqa jaqynmyn, fýtbol, basketbolmen aınalysqanmyn. Osydan eki jyl buryn qazaq kúresinen ótken respýblıkalyq týrnırde ardagerler arasynda chempıon boldym. Qazir osy jarystan keıin sambodan týrnır ótedi, soǵan daıyndalamyn», - deıdi Aıdar Qalıjanov.

Uıymdastyrýshylardyń aıtýynsha, bıyl «Qyzyljar barysy» týrnıriniń baǵalaý júıesine birqatar ózgeris engizilgen. Osyǵan deıin qoldanylyp kelgen búk upaıy erejeden alynyp tastaldy. Onyń ornyna eki ret tizege otyrǵan palýanǵa eskertý berilmek.




«Búk degen upaı bolatyn. Ol alynyp tastaldy. Endi qazir eki ret búkke túsken palýanǵa eskertý beriledi. Bul ózgeris maǵan unamaıdy. Sebebi eki myqty palýan kezdesken kezde búk alýdyń ózi óte qıyn. Ol ońaılyqpen búkke túsire almaıdy. Sol búktiń arqasynda buryn jeńimpaz anyqtalyp jatatyn. Ýaqyt kórsete jatar. Múmkin durys ta shyǵar», - deıdi jarystyń bas tóreshisi Eslámbek Bekmurzın.

Birneshe saǵatqa sozylǵan týrnırdiń jeńimpazdary da anyqtaldy. «Qyzyljar barysy-2022» týrnıriniń altyn belbeýin jáne 500 myń teńge syıaqyny Muhıt Tursynov jeńip aldy. Kúmis júlde men 300 myń teńge Altynbek Aýsaǵıtovke buıyrdy. Bul eki balýan endi Nur-Sultan qalasynda ótetin respýblıkalyq «Qazaqstan barysy» jarysynda oblys namysyn qorǵamaq. Al úshinshi orynǵa kúresken Qaıyrbek Batyrhannyń kúshi Baýyrjan Mýsınnen basym bolyp tústi, nátıjesinde oǵan qola júlde men 200 myń teńge syıaqy buıyrdy.














Joǵary qaraı