Qyzylordalyq kásipker Sábıt Shontaqbaevtyń ata-anasyna 1 mln teńge syılady

QYZYLORDA. QazAqparat - Elordada kópqabatty úıdiń terezesinen qulap kete jazdaǵan 3 jasar qyzdy qutqaryp alǵan Sábıt Shontaqbaevtyń ata-anasyna oblys basshylyǵy tarapynan da qurmet kórsetildi, dep habarlaıdy QazAqparat tilshisi.

Jalaǵash aýdanyna qarasty Aqqum aýylynda turatyn Sábıttiń ákesi Serik Shontaqbaev pen anasy Gúlbarshyn Pirimbetovaǵa aýdan ákimi Asqarbek Esjanov rızashylyq bildirip, óńir basshysynyń Alǵys hatyn tabystady.

«Oqys oqıǵanyń aldyn alyp, 3 jasar búldirshindi aman saqtap qalýy - naǵyz batyrlyq pen batyldyqtyń shynaıy úlgisi. Sábıttiń bul áreketi Syr jurtshylyǵynyń ǵana emes, elimizdiń barlyq azamattarynyń júregine áser etti. Osyndaı erjúrek, eljandy ul ósirip, tálim-tárbıe bergenderińizge Alǵysymdy jetkizemin», - dep jazylǵan Alǵys hat mátininde.

Sondaı-aq, oblys ákiminiń atynan syı-sııapat kórsetilip, teledıdar tartý etildi.

Al, aýyl sharýashylyǵymen aınalysatyn jergilikti kásipker erjúrek azamattyń ata-anasyna 1 mln teńge qarjylaı syıaqy tabys etti.

Eske salsaq, budan buryn Sábıt Shontaqbaevtyń áıeli «Erlik jasaýǵa eshkim daıyndalmaıdy» dep oı bildirgen edi.