Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qyzylordada jergilikti mańyzy bar avtokólik joldarynyń jaǵdaıy jaqsardy

2021 jyldyń 28 qazan 2021 13:53

QYZYLORDA. QazAqparat - Qyzylorda oblysynda jergilikti mańyzy bar avtokólik joldardyń jaǵdaıy jaqsardy, dep habarlaıdy QazAqparat tilshisi.

Búgin oblys ákimi Gúlshara Ábdiqalyqova «Jol aktıvteriniń ulttyq sapa ortalyǵy» RMK-niń bas dırektory Zamır Saǵynovpen kezdesti.

Basqosýda jergilikti mańyzy bar avtomobıl joldaryn damytý boıynsha máseleler qozǵaldy.

Kezdesýde aımaq basshysy oblystyq jáne aýdandyq mańyzy bar joldardyń jaqsy jáne qanaǵattanarlyq jaǵdaıynyń ındıkatorlyq kórsetkishi josparly 75 paıyzǵa jetkizilgenin atap ótti.

«Memleket tarapynan joldar jelisin salý, keńeıtý jáne jóndeý jumystaryna jyl saıyn qajetti qarajat bólinip keledi. 2020 jyly oblystyń jergilikti mańyzy bar avtomobıl joldaryn jaqsartýǵa respýblıkalyq bıýdjetten 11,8 mlrd. teńge qaraldy. 2021 jyly tórt memlekettik baǵdarlama arqyly respýblıkalyq bıýdjetten 10,8 mlrd. teńge kóleminde ınvestıtsııa tartyldy. Sondaı-aq jergilikti bıýdjetten sońǵy eki jylda 15,7 mlrd. teńge bólinip, uzyndyǵy 820 shaqyrym kóshe jáne joldar jelisi jóndeýden ótkizildi. Nátıjesinde oblystyq jáne aýdandyq mańyzy bar joldardyń jaqsy jáne qanaǵattanarlyq jaǵdaıynyń ındıkatorlyq kórsetkishi josparly 75 paıyzǵa jetkizildi. Ótken jyly ol kórsetkish 70 paıyz bolatyn», - dedi oblys ákimi.

Basqosýda «Jol aktıvteriniń ulttyq sapa ortalyǵy» respýblıkalyq memlekettik kásipornynyń bas dırektory Zamır Saǵynov bıyl jergilikti mańyzy bar avtomobıl joldaryn damytý boıynsha atqarylǵan jumystardy tizbeledi.

Jıyn sońynda oblys ákimi jol ınfraqurylymyn jaqsartýda josparlanǵan jumystardy birge atqaratynyn atap ótti.

Bul salanyń erekshe baqylaýda ekenin jetkizdi.

Sondaı-aq, jol qurylysy sapasyna nemquraıly qaraıtyn merdiger kompanııalardy zań júzinde jaýapkershilikke tartýdy qatań eskertti.

Aıta keteıik, oblys aýmaǵynda avtomobıl joldarynyń jalpy uzyndyǵy 3397 shaqyrymdy quraıdy.

Onyń 1016 shaqyrymy - respýblıkalyq, 557 shaqyrymy - oblystyq, 1824 shaqyrymy - aýdandyq mańyzy bar avtomobıl joldary.

Eske salsaq, Qyzylorda oblysynda Japonııa úkimetiniń baǵdarlamasy júzege asyrylyp jatyr.





Avtor Ádiljan Úmbet
Basty sózder: Jol, Qyzylorda oblysy, Aımaq, Kólik,
Joǵary qaraı