Aýa raıy
Astana -13 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Qyzylordada Syrdarııa ózeniniń sol jaǵalaýyn ıgerý jumystary jalǵasýda

2020 jyldyń 31 qazan 2020 12:31

QYZYLORDA. QazAqparat - Qyzylordada Syrdarııa ózeniniń sol jaǵalaýyn ıgerý jumystary jalǵasýda, dep habarlaıdy QazAqparat tilshisi.

Qyzylorda qalasynyń bas josparyna sáıkes, 2017 jyldan beri oblys ortalyǵynda Syrdarııa ózeniniń sol jaǵalaýynda jańa qalanyń qurylysy bastaldy.

Jalpy aýmaq 1532 gektardy quraıdy. Onyń 367 gektary demalys aımaǵyna, 537 gektary turǵyn úıge, 190 gektary saýda jáne keńse ǵımaratyna, 270 gektary áleýmettik ınfraqurylymǵa bólingen.

«Aldaǵy ýaqytta atalǵan aýmaqta 3 mıllıon sharshy metrden astam turǵyn úı salynady. Onyń úshten bir bóligi 2025 jylǵa deıin jobanyń birinshi kezeńi aıasynda paıdalanýǵa beriledi. Sonyń arqasynda 50 myń adam jańa pátermen qamtamasyz etiledi. Keleshekte munda 155 myńnan astam qala turǵyny baspanaly bolady dep josparlanyp otyr.

Joba boıynsha 16 jańa mektep, 12 balabaqsha, 4 densaýlyq saqtaý mekemesi, onyń ishinde 100 kelýshige arnalǵan emhanasy bar 300 tósektik kópbeıindi aýrýhana, otbasylyq medıtsına ortalyǵy, oblystyq qan ortalyǵy paıdalanýǵa berilmek. Oǵan qosa oblystyq mýzykalyq-drama teatry, neke saraıy jáne basqa da birqatar áleýmettik, mádenı jáne sporttyq nysandar salynady», - dep málim etti Qyzylorda oblysy ákimdiginen.

Búgingi tańda Syrdarııa ózeniniń sol jaǵalaýynda «Bolashaq» ýnıversıtetiniń bas ǵımaraty, IT-parki bar jastar resýrstyq ortalyǵy, 320 oryndyq balabaqsha, 700 oryndyq jeke mektep, 2234 páterlik 48 kópqabatty turǵyn úı salyndy.

Sol jaǵalaýda «Rýhanı jańǵyrý» ortalyǵy men qalalyq mýzeı jumys isteıdi.

Ol Qazaq Ortalyq Atqarý Komıteti ǵımaratynyń syzbasy boıynsha salynǵan. Atalǵan tarıhı ǵımaratta 1925 jyly Qyrǵyz ASSR-in Qazaq ASSR-i dep ózgertý týraly tarıhı sheshim qabyldanǵan bolatyn.

Sondaı-aq, Qyzylordada «Abaı» operasy tuńǵysh ret sahnalandy.


Avtor Ádiljan Úmbet
Basty sózder: Qurylys, Qyzylorda oblysy,
Joǵary qaraı