Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qyzylordada koronavırýs juqtyrǵandar sany artty

2021 jyldyń 6 sáýir 2021 19:35

QYZYLORDA. QazAqparat - Qyzylorda oblysynda koronavırýs juqtyrǵandar sany artyp ketti. Olardyń basym bóligi qaterli vırýs juqtyrǵan naýqastarmen jaqyn qarym-qatynasta bolǵandar arasynan anyqtalǵan, dep habarlaıdy QazAqparat tilshisi.

Ótken táýlikte oblysta 39 adam koronavırýs juqtyrǵan. Osyǵan baılanysty oblystyń bas memlekettik sanıtarııalyq dárigeri Dınara Jańabergenova úndeý jarııalady. Onda jumys oryndaryndaǵy sanıtarııalyq-epıdemıologııalyq, dezınfektsııalyq talaptardyń oryndalýyna jiti mán berýdi suraǵan.

Búgingi kúni oblys boıynsha koronavırýstyq ınfektsııa juqtyrǵandar sany 4198 adamǵa jetti. Onyń 3 paıyzy syrttan tasymaldanǵan bolsa, 56 paıyzy skrınıngtik tekserý nátıjesinde anyqtalǵan. Al 41 paıyzy qarym-qatynas arqyly juqtyrǵan.

Óńirde karantın talaptary kezeń-kezeńimen jeńildetilgen. Degenmen birqatar shekteýler áli de saqtalýda. Biraq toı jasaý, saltanatty sharalar ótkizý tyıylmaı tur. Arnaıy monıtorıngtik top jyl basynan beri otbasylyq 28 toı-jıyn ótkizgen degen derek anyqtaldy. Eske salaıyq, qazir tek shekteýli adamdar sanymen tek as berýge ruqsat etilgen.

«Árbir turǵynnyń vırýstyń taralýyn toqtatýǵa múmkindigi bar. Ol betperde kııý, jeke gıgıena talaptaryn, qoǵamdyq oryndarda araqashyqtyq saqtaýmen baılanysty. Sondaı-aq dene qyzýy kóterilip, jótel jáne tynys alý qıyndaǵan jaǵdaıda medıtsınalyq kómekke júginýge shaqyramyn. Adamdar kóp shoǵyrlanatyn oryndarǵa barýdy, shekten tys qonaq shaqyryp, otbasylyq merekelerdi toılaýdy keıinge qaldyrýdy suraımyn. Árbir turǵyn mamandar keńesine qulaq asyp, karantın talaptaryn oryndasa ınfektsııanyń da taralýyn tejeýge múmkindik bolady. Jaýapkershilik ortaq - qaýipsizdik te ortaq», - dedi Dınara Jańabergenova.

Esterińizge sala ketelik, budan buryn Qyzylorda oblysynda 7119 adam koronavırýsqa qarsy ekpe saldyrdy.



Joǵary qaraı