Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qyzylordada kásipkerlerdiń gaz taratý júıesine qosylýy úshin tehnıkalyq shart berile bastady

2022 jyldyń 21 qańtar 2022 11:34

QYZYLORDA. QazAqparat - Qyzylorda oblysynda kásipkerler úshin gaz taratý júıelerine qosylýǵa tehnıkalyq shart berý bastaldy, dep habarlaıdy QazAqparat tilshisi.

Bul - jergilikti kásipkerlerdiń ótken jyldan beri kóterip júrgen ózekti máselesi bolatyn.

«QazTransGaz» UQ» AQ 11 qańtarda jańa kommýnaldyq-turmystyq jáne ónerkásiptik kásiporyndardy gazben jabdyqtaý júıesine qosýǵa tehnıkalyq shart berý qaıta bastalǵanyn jetkizdi.

Ótken jyldyń 17 qyrkúıeginde «QazTransGaz» UQ» AQ bas dırektory «Gazben jabdyqtaý júıesine qosýǵa tehnıkalyq shart berýdi toqtata turý týraly» buıryq shyǵarǵan bolatyn.

Buıryqqa saı 11 óńirde, sonyń ishinde Qyzylorda oblysynda jańadan qosylatyn kásipkerlik nysandarǵa tehnıkalyq shart berý toqtatyldy.

«Kásipkerlik nysandardy gazben jabdyqtaý júıesine qosýǵa tehnıkalyq sharttardy berýdi toqtatý kásipkerlikti damytýǵa aıtarlyqtaı kedergisin keltirdi. Kásipkerler nysandardy ýaqytyly iske qosa almaýy saldarynan nesıelik mindettemelerdi oryndaýyna qıyndyǵyn tıgizip, qarjylyq jaǵdaıy nasharlady. Bizde bar aqparat boıynsha, oblysta 27 kásipkerge tehnıkalyq shart berýden bas tartyldy. Shekteý sharalary óńirdiń ınvestıtsııalyq tartymdylyǵyn tómendetýge jáne iske asyrylyp jatqan ınvestıtsııalyq jobalardy toqtatýǵa alyp keletin edi», – deıdi kásipkerler palatasynyń dırektory Ǵalymbek Jaqsylyqov.

Atalǵan máselege qatysty kásipkerler palatasyna kásipkerlik sýbektilerinen gazben jabdyqtaý jelilerine qosýǵa tehnıkalyq sharttardy alýǵa kómek kórsetý týraly birneshe ótinish tústi.

Osyndaı ótinishter Baqytbek Erboshaev pen Qaırat Dosymov syndy jeke kásipkerlerden keldi.

Kásipkerler naýbaıhana ashý úshin jeńildetilgen nesıege qural-jabdyqtar satyp alady.

Endigi kezekte kásipkerlik nysanyn gazǵa qosý maqsatynda «QazTransGaz Aımaq» AQ-na ótinish berse, olardyń ótinishinen atalǵan mekeme bas tartqan.

Bul másele palata mamandarymen jan-jaqty zerdelenip, ótken jyldyń 23 jeltoqsanynda óńirlik keńes otyrysynda da oblystyq energetıka jáne turǵyn úı-kommýnaldyq sharýashylyǵy basqarmasy, «QazTransGaz Aımaq» AQ ókilderimen talqylandy.

«Bizdiń máselemiz Óńirlik keńeste qaralyp, oń sheshildi. Palata mamandarynyń súıemeldeýimen tehnıkalyq shart alyp, qazir gazǵa qostyrý jumystaryn retteýdemiz. Naýbaıhana ujymy atynan oblystyq kásipkerler palatasynyń ujymyna alǵys aıtamyz», - deıdi jeke kásipker Qaırat Dosymov.

Kásipkerler palatasy bul problemanyń aımaqta kásibin jańadan iske qosyp jatqan kásipkerlerge aıtarlyqtaı kedergi bolyp, alańdaýshylyq týdyryp turǵanyn eskertip ótken jyldyń 27 jeltoqsanynda «QazTransGaz» UQ» AQ-na hat joldaǵan edi.

Jaqynda máseleniń oń sheshilgeni týraly aqparat aldy.

11 qańtarda «QazTransGaz» UK» AQ óńirlerdegi «QazTransGaz Aımaq» AQ-na jazǵan hatynda: «Tabıǵı gaz el óńirleriniń áleýmettik-ekonomıkalyq damýynda mańyzdy ról atqaratynyn, sondaı-aq Qoǵamnyń shaǵyn jáne orta bıznesti qorǵaýǵa beıindiligin eskere otyryp, gaz qubyry ınfraqurylymynyń tehnıkalyq múmkindigin jáne jazǵy jáne qysqy kezeńderde júktelýin eskere otyryp, gazben jabdyqtaý júıesine jańa kommýnaldyq-turmystyq jáne ónerkásiptik kásiporyndardy qosýǵa tehnıkalyq sharttardy berýdi qaıta bastaý qajettiligi týraly habarlaımyz», - dep kórsetilgen.

Sondaı-aq, Qyzylordada tártipsizdik saldarynan zardap shekken kásipkerlerdiń tizimi jasalýda.


Joǵary qaraı