Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qyzylorda oblysynda 5 myń gektar kúrish alqaby qysqardy

2022 jyldyń 24 mamyr 2022 10:50

NUR-SULTAN. QazAqparat – Sý únemdeý sharalarynyń aıasynda bıyl Qyzylorda oblysynda 5 myń gektar kúrish alqaby qysqardy, dep habarlaıdy QazAqparat tilshisi.

Ekologııa, geologııa jáne tabıǵı resýrstar mınıstri Serikqalı Brekeshev Úkimet otyrysynda osyndaı derek keltirdi.

«Almaty oblysynda sý resýrstarynyń tapshylyǵyn qysqartý maqsatynda oblys ákimdigi ylǵal syıymdy daqyldardyń, onyń ishinde Balqash aýdanynda kúrishtiń egistigin 1 myń gektarǵa azaıtty.

Oblystyń barlyq sý qoımalary vegetatsııalyq kezeńge bekitilgen kestege sáıkes jumys isteıdi.

Jambyl oblysynda da, buryn aıtylǵandaı, memleketaralyq paıdalaný obektilerine sý berý kesteleri bekitildi.

Sondaı-aq, qazirgi ýaqytta oblys aýmaǵynda sýarý jelilerin rekonstrýktsııalaý baǵytynda aýqymdy jumystar júrgizilip jatqanyn atap ótý qajet. Sýarmaly sý berý aınalma kanaldar arqyly júzege asyrylýda», - dedi vedomstvo basshysy.

Onyń málimetinshe, Túrkistan oblysynda bıyl kúrish alqaby 600 gektarǵa deıin qysqartylǵan.

«Qyzylorda oblysynda kúrish alqaby 78,3 myń gektarǵa deıin tómendedi. Bul ótken jylmen salystyrǵanda, 5 myń gektarǵa az. Sondaı-aq, Úkimet rezervinen uńǵymalardy jóndeý men burǵylaýǵa, sorǵy qondyrǵylaryn satyp alýǵa 3,6 mlrd teńge somasynda qarajat bólindi», - dedi Serikqalı Brekeshev.

Mınıstrdiń aıtýynsha, bıyl Shardaraǵa 5 mlrd tekshe metr sý jınaýǵa múmkindik bar.


Avtor Esimjan Naqtybaı
Basty sózder: QR Úkimeti, Jer máselesi, ,
Joǵary qaraı