Aýa raıy
Astana 1 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Qus tumaýy adamǵa juǵýy múmkin – mamandar

2020 jyldyń 17 qyrkúıek 2020 14:21

PETROPAVL. QazAqparat – Soltústik Qazaqstan oblysynda qus tumaýynyń taralýyna baılanysty mamandar turǵyndarǵa birqatar saqtyq sharasyn ustaný qajettigin eskertedi. Óıtkeni bul aýrý adamǵa juǵady, dep habarlaıdy QazAqparat tilshisi.

Joǵary patogendi qus tumaýy adam úshin qaýipti.

Mamandardyń aıtýynsha, negizinen ol aýrý qustyń eti men jumyrtqasyn paıdalanǵannan juǵady.

«Qandaı bolmasyn vırýs 70 gradýstan artyq ystyq temperatýrada óledi. Sol sebepti shıkideı pisken jumyrtqany jeýge bolmaıdy. Kimniń ımmýnıteti nashar, tynys alý músheleriniń sozylmaly aýrýlary bar – olar da qus tumaýyn juqtyryp, aýrýy múmkin. Buǵan deıin de óńirde qus tumaýy tirkeldi. Alaıda ázirshe adamdar ony juqtyrǵan joq», - deıdi QR AShM Veterınarlyq baqylaý jáne qadaǵalaý komıtetiniń oblystyq aýmaqtyq ıspektsııasynyń jetekshisi Marat Ibraev.

Qus tumaýyn juqtyrǵan adamda onyń belgileri tek úsh kúnnen keıin ǵana biline bastaıdy. Kádimgi tumaýdan aıyrmashylyǵy joq: adamnyń dene qyzýy kóteriledi, býyndary syrqyrap aýyryp, tamaǵy qyzarady, jótel paıda bolady. Keıde konıýktıvıt paıda bolady eken.

«Aýrý asqynǵan jaǵdaıda ókpe-júrek jetispeýshiligi paıda bolady. Ókpe isip, pnevmonııaǵa ulasýy múmkin. Qan tamyrlarynyń jumysy buzylyp, ish ótedi, qusyp, mı isinip ketedi. Qus tumaýyn juqtyrǵan adam ádettegi tumaýdaǵy preparattarmen emdeledi», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy ıÝlııa Gaısına.

Mamandardyń aıtýynsha, qus tumaýynyń aldyn alýǵa bolady. Ol úshin qusty qamap ustaý qajet. Al aýrýdyń belgileri paıda bolǵan jaǵdaıda birden veterınar mamandarǵa habarlaǵan jón. Qusty baǵýǵa kıetin arnaıy kıim bolýy qajet. Ony únemi jýyp, tazalap otyrǵan jón.

«Qusqa beriletin jemazyqty jabaıy qustar kirmeıtindeı jabyq ustaý kerek. Al qus eti men jumyrtqasyn ruqsat etilmegen jerlerde saýda jasaýshylardan almaý qajet. Sýdy qaınatyp ishýge nemese bótelkedegi sýdy paıdalanýǵa keńes beremiz. Qoldy jıi jýyp, maska taǵyńyz jáne bir rettik sýlyqtardy paıdalanyńyz. Jalpy tumaýdan saqtanýdyń jaqsy joly – arnaıy ekpe ekkizý. Al aýrýdyń alǵashqy belgileri paıda bolǵan jaǵdaıda birden dárigerge kóringen jón», - deıdi ıÝlııa Gaısına.

Buǵan deıin SQO-nyń 7 aýdanynda qus tumaýynyń oshaǵy anyqtalǵanyn, qus tumaýynyń beleń alýyna baılanysty 10 eldimekenniń karantınge jabylǵanyn aıtqan edik.

Sondaı-aq SQO-da úı qustaryna qus tumaýyna qarsy vaktsına egiletini habarlandy.



Joǵary qaraı