Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Quqyq qorǵaý organdary qyzmetkerleriniń ókilettikti teris paıdalaný faktilerine tekseriledi

2022 jyldyń 25 qańtar 2022 19:23

NUR-SULTAN. QazAqparat – Quqyq qorǵaý organdary qyzmetkerleriniń laýazymdyq ókilettikterin teris paıdalanýy faktilerine tekseris júrgiziledi. Bul týraly búgin Ortalyq kommýnıkatsııalar qyzmetinde QR ІІM Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Іshki ister organdary tergeýshileriniń qylmystyq ister boıynsha barlyq sheshimderi zańnama talaptarymen qatań sáıkestikte, atap aıtqanda, qylmystyq protsestiń úsh býyndy modeli aıasynda qabyldanady. Kúdiktini ustaý, olardyń is-áreketterin saralaý, sondaı-aq bultartpaý sharalaryn tańdaý sııaqty barlyq negizgi is júrgizý sheshimderi tek prokýrormen kelisiledi. Odan ózge, tintý, alý, saraptama úshin úlgilerdi alý, sanktsııalaý sııaqty is júrgizý áreketteri tergeý sottarynyń qaýlysy negizinde júrgiziledi. Qylmys jasady degen kúdik boıynsha ustalǵan barlyq adam dene jaraqattarynyń bolýyna medıtsınalyq kýálandyrý júrgizilgennen keıin ǵana, ýaqytsha ustaý abaqtysyna qamalady. Sebebi keıbireýleri tártipsizdik ornynan tikeleı medıtsınalyq mekemelerge jetkizilen», - dedi S. Ádilov.

Onyń aıtýynsha, ustalǵan kúdiktilerdiń advokattarǵa qoljetimdiligi qamtamasyz etiledi, qajet bolǵan jaǵdaıda memleket qarajaty esebinen tegin qorǵaýshylar qyzmeti usynylady.

«Quqyq qorǵaý organdary qyzmetkerleriniń laýazymdyq ókilettikterin teris paıdalanýy jáne bılikti asyra qoldanýy týraly árbir shaǵymǵa prokýratýra organdarymen qatar, Іshki ister mınıstriniń tapsyrmasymen ózindik qaýipsizdik bólinisteri tekserý júrgizedi. Olardyń baılanys derekteri birinshi kúnnen buqaralyq aqparat quraldarynda jarııalanǵan. Sonymen qatar, arnaıy mekemelerdiń medıtsına qyzmetkerleriniń usynymdary boıynsha densaýlyq jaǵdaıyna baılanysty birqatar kúdiktilerge qatysty bultartpaý sharalaryn ózgertý máseleleri qarastyrylýda. Búginge osy negizder boıynsha jáne jeke basyn eskere otyryp, birqatar kúdikti kúzetten bosatyldy. Olarǵa qatysty qoǵamnan oqshaýlaýǵa baılanysty emes bultartpaý sharalary qoldanyldy», - dedi Tergeý departamentiniń bastyǵy.

Budan buryn habarlanǵandaı, tártipsizdik kezinde zaqym kelgen nysandar men kólikter sany belgili boldy.

Sonymen qatar, qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy.

Sanjar Ádilov elimizdegi tártipsizdik kezinde qozǵalǵan qylmystyq ister týraly aıtyp berdi.


Joǵary qaraı