Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Kranshy bolý úshin bul kásipti qatty jaqsy kórý kerek – Farhana Safarǵaleeva

2022 jyldyń 24 qańtar 2022 20:43

PETROPAVL. QazAqparat – Petropavl turǵyny Farhana Safarǵaleeva ǵumyrynyń 40 jylyn qurylys salasyna arnasa, sonyń 20 jylynda aspaly krandy basqaryp keledi, dep habarlaıdy QazAqparat tilshisi.

59 jastaǵy Farhana Safarǵaleeva temir-beton buıymdaryn shyǵaratyn kásiporynda aspaly kranda jumys isteıdi. Bul mamandyqqa 20 jasynda boıjetken shaǵynda kelgen ol keıin jumysyn aýystyrǵanymen, biraq súıikti kásibin umyta almaǵan.

«80-shi jyldary mektepti bitirip, Petropavldaǵy 24-inshi ýchılıege oqýǵa tústim. Oqý ornyn bitirisimen bizdi joldama boıynsha temir-beton buıymdaryn shyǵaratyn kásiporynǵa jiberdi. Ol jerde 4 jylǵa jýyq jumys istedim. Odan úı qurylysy kombınatyna aýystym. Sol jerden dekrettik demalysqa kettim. Qyzym óskesin jumysqa shyǵyp, basqa qurylys kompanııalarynda eńbek ettim. Biraq, kranshy jumysyn umyta almadym, bul kásip er adamdardyń qoly bolǵanymen, aýyr bolsa da ózime unaıdy. Sondyqtan qaıtyp keldim kranshy bolyp», - deıdi Farhana Safarǵaleeva.




Farhana Ánýarbekqyzynyń qurylys salasynda eńbek etip júrgenine 40 jyl. Bilimin jetildirý úshin syrttaı tehnıkýmdy aıaqtady.

«Jumystyń ońaıy joq, sondyqtan atqarǵan isińdi jaqsy kórýiń kerek jáne óte jaqsy isteýge tyrysý qajet. Bul jumysta eń bastysy uqyptylyq. Óıtkeni kranshyǵa úlken jaýapkershilik artylady. Tómende qanshama adam jumys istep júr. Aýyr plıtalardy kótergen kezde abaılamasań, talaptardy qatań saqtamasań bireýdi maıyp etýiń múmkin. Tómende júkti ilip turǵan mamandy tyńdaý kerek. Túrli panelderdi, jabyndardy kóteremin, qurylys basyna áketýi úshin artyp beremin. Bul jerde negizgi jumys krandiki. Tómende jigitter armatýralaıdy, al ony ornynan qozǵaý, artý – bárin kran atqarady. Kransyz jumys toqtap qalady», - deıdi aspaly kran mashınısi.

Kásiporynda jumys tańǵy saǵat 8.00-de bastalyp, keshki 17.00-de aıaqtalady. Farhana Safarǵaleeva 8 metrlik aspaly kranǵa otyryp, aýyr temir-beton buıymdardy tasymaldaıdy. Mamannyń aıtýynsha, sózben aıtýǵa jeńil, biraq kranshyǵa tańerteńnen keshke deıin zeıindi joǵaltpaý qajet. Krandy júrgizýdi úırenýge kelgen shákirtterin de tájirıbeli maman jaýapkershilikti birinshi orynǵa qoıýdy úıretedi.




«Kranshy, negizinen er adamnyń kásibi bolyp esepteledi. Alaıda, ujymda úsh áıel bolsa, olardyń úsheýi de krandy júrgizedi. Tek bizdiń kásiporynda ǵana Farhana Ánýarbekqyzy 20 jyldan artyq kranshy bolyp istep keledi. Ol bilikti maman, kásiporynǵa kelgen jastardy tárbıelep, bilgenimen bólisedi. Jalpy ujymda 300-den artyq adam bar. Turǵyn úı qurylysyna qajet temir-beton ónimderin shyǵarýmen aınalysamyz», - deıdi kásiporynnyń bas ınjeneri Andreı Nekrasov.

Sanaly ǵumyryn qurylys salasyna arnaǵan Farhana Safarǵaleevanyń eńbegi elenip, el Táýelsizdiginiń 30 jyldyǵyna oraı ІІІ dárejeli «Eńbek Dańqy» ordenimen marapattaldy.


Joǵary qaraı