Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

QR Prezıdenti Qorǵanys mınıstrliginiń basshylyq quramymen keńes ótkizdi

2022 jyldyń 19 qańtar 2022 17:37

NUR-SULTAN. QazAqparat - Qazaqstan Respýblıkasynyń Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys mınıstrliginiń basshylyq quramymen keńes ótkizdi, dep habarlaıdy Aqorda.

Memleket basshysy Qasym-Jomart Toqaev Murat Bektanovty Qorǵanys mınıstri laýazymynan bosatyp, bul qyzmetke Rýslan Jaqsylyqovty taǵaıyndaý týraly Jarlyqtarǵa qol qoıǵanyn habarlady.




Qasym-Jomart Toqaev jańa mınıstrdiń kadrlyq áskerı qyzmetker ekenin, arnaıy bilimdi Almaty Joǵary jalpyáskerı komandalyq ýchılıesinde oqyǵanyn, keıin M.V. Frýnze atyndaǵy akademııada jáne Reseı Federatsııasy Qarýly Kúshteri Bas shtabynyń Áskerı akademııasynda bilimin jalǵastyrǵanyn atap ótti.

«Onyń tájirıbesi mol. Іshki áskerde 30 jyldan astam qyzmet etti. Ol qatardaǵy jaýyngerden bastap, ártúrli basshylyq qyzmetterdi atqardy. Іshki ister mınıstriniń orynbasary – Ulttyq ulannyń Bas qolbasshysyna deıingi áskerı joldan ótti», – dedi Prezıdent.

Qasym-Jomart Toqaev Qarýly Kúshterge degen talaptyń kúsheıe túskenine toqtaldy.

«Armııa Táýelsizdigimizdiń tiregi bolyp, memleket múddelerin qorǵaýy tıis. Qańtar oqıǵasy kezinde Qarýly Kúshter ózine senimsiz ári qabiletsiz basshylyǵynyń kesirinen júktelgen mindetterdi tıisti deńgeıde atqara almady. Mınıstr Bektanov komandırlik qabiletin kórsete almady. Komandalyq-shtabtyq jáne áskerı jattyǵýlar kezinde oń nátıje kórsetken armııamyz bola tura, syn saǵatta onyń áleýetin paıdalana almadyq. Syrttan kómek shaqyrýǵa májbúr boldyq, – dedi Joǵarǵy Bas qolbasshy.

Sonymen qatar Prezıdent Qazaqstandaǵy bitimgerlik mıssııasyn aıaqtaǵan UQShU kontıngentiniń jumysyna oń baǵa berdi.

«UQShU-nyń bitimgerlik kúshteri Qazaqstanǵa qysqa merzimge ǵana kelip, qorǵaý qyzmetin atqardy. Ujymdyq kontıngent ózderiniń tıimdiligin jáne áleýetin kórsetti», – dedi Memleket basshysy.

Prezıdent geosaıası jaǵdaıdy jáne aımaqtyq deńgeıdegi ózekti syn-qaterlerdi eskere otyryp, Qazaqstan Qarýly Kúshteriniń áskerı daıyndyǵyn túbegeıli arttyrýdy talap etti. Ol úshin birqatar mindetti oryndaý qajet.

Joǵarǵy Bas qolbasshynyń pikirinshe, eń aldymen, el basshylyǵyn syrtqy jáne ishki qaýip-qaterler týraly ýaqtyly ári naqty aqparattarmen qamtamasyz etýge tıisti áskerı barlaý qyzmetin kúsheıtý kerek.




Memleket basshysynyń Jarlyǵyna sáıkes qurylatyn Arnaýly operatsııalar jónindegi kúshterdiń Basshylyǵyna mańyzdy mıssııa júkteledi. Sondaı-aq olarǵa qysqa merzim ishinde basqa kúshtik qurylymdarmen birlesip, barlyq uıymdastyrý sharalaryn qabyldap, arnaýly operatsııalardy oryndaýǵa daıyndalý mindeti júkteledi.

Qasym-Jomart Toqaev qarý-jaraq saqtaıtyn nysandarda tótenshe jaǵdaılardyń qaıtalanýyna jol bermeý qajettigin eske saldy. Osyǵan baılanysty Prezıdent qarý-jaraqtardyń saqtalý qaýipsizdigin qamtamasyz etý, paıdalanýǵa jaramsyz jáne ári qaraı saqtaýǵa qaýipti qarý-jaraqtardy joıý sharalaryn júzege asyrýdy jalǵastyrý kerek ekenin aıtty.

Sonymen qatar Memleket basshysy Qazaqstan armııasynyń tehnıkalyq jáne jaýyngerlik jabdyqtaryn jańartý mindetin júktedi.

«Áskerdegi qarý-jaraqtyń deni – 30-50 jyl bolǵan keńes dáýirindegi tehnıka. Eskirgen tehnıkalardyń merziminiń ótkenine baılanysty qarý-jaraq parkin jańartý úshin shuǵyl sharalar qabyldaý qajet. Qarýly Kúshter zamanaýı ári joǵary tehnologııalyq qarý-jaraqpen, áskerı tehnıkamen jabdyqtalýy tıis. Qabyldanatyn sharalar júıeli bolýy kerek. Qarý-jaraq pen áskerı tehnıkany jóndeıtin, olarǵa qyzmet kórsetetin otandyq óndiristi damytý qajet», – dedi Joǵarǵy Bas qolbasshy.

Memleket basshysy áskerdiń shuǵyl áreket etý qabiletin artyryp, áskerı-transporttyq avıatsııanyń áleýetin kúsheıtý qajet ekenine toqtaldy. Onyń aıtýynsha, áskerı boryshty óteý mindetiniń bedelin kóterip, abyroıyn arttyrý qajet.

Sonymen qatar Qasym-Jomart Toqaev qańtar oqıǵasynyń sabaqtaryn eskere otyryp, Qarý-jaraq jáne áskerı tehnıka satyp alý jónindegi 2022 jylǵa arnalǵan jospardy qaıta qaraýdy jáne Qarýly Kúshterdegi kadrlyq áleýetti arttyrý sharalaryn qabyldaýdy tapsyrdy.

Budan keıin Rýslan Jaqsylyqov Qazaqstan Respýblıkasynyń Qorǵanys mınıstri retinde ant qabyldady.

Jıyn sońynda Prezıdent jańa mınıstrge jáne Qorǵanys mınıstrliginiń ujymyna sáttilik tiledi.



Joǵary qaraı