Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

QR Prezıdenti: Qazaqstan – EýroOdaqtyń Ortalyq Azııadaǵy basty saýda seriktesi

2021 jyldyń 19 tamyz 2021 15:56

NUR-SULTAN. QazAqparat - Memleket basshysy Eýropalyq Odaqtyń Ortalyq Azııa boıynsha arnaýly ókili Terı Hakalany qabyldady, dep habarlaıdy QazAqparat Aqordaǵa silteme jasap.

Qasym-Jomart Toqaev Terı Hakalany Eýropalyq Odaqtyń Ortalyq Azııa boıynsha arnaýly ókili laýazymyna taǵaıyndalýymen quttyqtap, qyzmetine tabys tiledi.

Terı Hakala Qasym-Jomart Toqaevqa Eýropalyq Keńestiń Prezıdenti Sharl Mısheldiń sálemin jetkizdi. Onda Keńes basshysynyń Qazaqstan Prezıdentin osy jyldyń sońyna deıin Brıýsselge shaqyratyny aıtylǵan.

Memleket basshysy Qazaqstannyń Eýropalyq Odaqpen ózara strategııalyq is-qımylyna oń baǵa berdi. 2020 jyldyń naýryz aıynda kúshine engen Keńeıtilgen áriptestik jáne yntymaqtastyq jónindegi kelisim osy qatynastarǵa tyń serpin berdi.





– Biz Eýropalyq Odaqpen qarqyndy saýda-ekonomıkalyq jáne ınvestıtsııalyq baılanystardy joǵary baǵalaımyz. Qazaqstan – Eýropalyq Odaqtyń Ortalyq Azııadaǵy basty saýda seriktesi. 2020 jyldyń qorytyndysy boıynsha ekijaqty saýda aınalymy 24 mıllıard dollarǵa jýyqtady, – dedi Qazaqstan Prezıdenti.

Memleket basshysy men Eýropalyq Odaqtyń arnaýly ókili daǵdarystan keıingi kezeńde ózara is-qıyldyń baǵyttary ishinde jańartylatyn energetıka, joǵary tehnologııalar, ınfraqurylym men densaýlyq saqtaý salalaryna erekshe basymdyq beriletinin atap ótti.

Halyqaralyq kún tártibin talqylaý barysynda Aýǵanstandaǵy jaǵdaıǵa erekshe mán berildi.

Qasym-Jomart Toqaev Aýǵanstanda kúrt ózgergen áskerı-saıası jaǵdaıǵa baılanysty týyndap otyrǵan syn-qaterlerge alańdaýshylyq bildirdi. Prezıdenttiń aıtýynsha, bul jaǵdaıdyń bar aýyrtpalyǵy qaqtyǵys aımaǵyna jaqyn ornalasqan – Ortalyq Azııa memleketterine sezilip otyr.

Taraptar Aýǵanstannyń barlyq aýmaǵynda jýyq arada jaǵdaıdyń turaqtalyp, qoǵamdyq tártiptiń ornyǵýyna, adam quqyqtary men erkindiginiń saqtalýyna jáne Kabýldyń halyqaralyq áýejaıynan adamdardy kedergisiz kóshirýge qatysty pikirlerin bildirdi.

Qazaqstan Prezıdenti men Arnaýly ókil Ortalyq Azııa elderi men Eýrazııalyq Odaq arasyndaǵy qarym-qatynasta atalǵan máseleniń mańyzyn eskere otyryp, baılanystardy qoldaýǵa daıyn ekenderin naqtylady.




Terı Hakala Qazaqstannyń tóraǵalyǵymen Jenevada ótetin Dúnıejúzilik saýda uıymy mınıstrleriniń konferentsııasyn qoldaıtynyn aıtty.

Áńgimelesý barysynda Taraptar Ortalyq Azııa memleketteriniń ózara is-qımyldary men keleshegi, onyń ishinde Túrikmenstanda ótken Memleket basshylarynyń úshinshi konsýltatıvtik kezdesýiniń qorytyndysy boıynsha pikir almasty.


Joǵary qaraı