Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

QR Kásipodaqtar federatsııasy eńbek qatynastaryna qatysty usynystaryn jarııalady

2021 jyldyń 27 qańtar 2021 19:24

NUR-SULTAN. QazAqparat - QR Kásipodaqtar federatsııasy eńbek qatynastaryndaǵy ózekti máselelerge qatysty Parlament depýtattaryna usynystaryn jarııalady, dep habarlaıdy QazAqparat tilshisi.

«Búgingi is-shara barysynda Májilis depýtattarymen jáne onlaın rejımde óńirlik máslıhattarǵa saılanǵan depýtattarmen kezdesý ótti. Osy oraıda áleýmettik eńbek qatynastaryndaǵy ózekti máselelerdi talqyladyq. Bul baǵytta zańnamalyq turǵydan jetildirý, jumyspen qamtý salasyndaǵy sapany kóterý aıasynda usynystar jasaldy», - dedi QR Kásipodaqtar federatsııasynyń tóraǵasy Satybaldy Dáýletalın.





Onyń sózine qaraǵanda, Kásipodaqtar federatsııasy Parlamentpen, máslıhattarmen tikeleı baılanysty jetildirýge ekpin qoıyp otyr.

«Qazir kásipodaqtar týraly zańnamany da jetildirý qajet bolyp tur, ıaǵnı ol búgingi suranysqa jaýap berýi kerek. Osy baǵytta bizde biraz usynystar bar. Sonymen qatar, Parlamentpen ózara baılanysta jumys isteýdiń tetikterin qarastyrdyq. Májilis quramynda fraktsııaaralyq depýtattyq top qurý bastamasyn kóterýge nıettimiz. Zańnama boıynsha mundaı qadamdy iske asyrýǵa bolady. 15 depýtat osy baǵytta birigýge qyzyǵýshylyq tanytsa, osyndaı depýtattyq top qurýǵa bolady. Olar kásipodaqtarmen tikeleı baılanysta bolady. Sebebi biz kúndelikti ómirde eńbek ujymyndaǵy jumysshylardyń jaǵdaıyn jaqsy bilemiz. Sondyqtan bul máselelerdi atalǵan toptyń aıasynda kóterýdi josparlap otyrmyz», - dedi S. Dáýletalın.





Onyń aıtýynsha, depýtattyq topqa ár partııanyń nemese Májilistegi komıtetterdiń músheleri kire alady. Atalǵan toptyń negizgi maqsaty – áleýmettik-eńbek salasyndaǵy zańnamany jáne oǵan qatysty ekonomıkalyq ári qoǵamdyq qatynastardy jetildirý.

«Jalpy, Kásipodaqtar federatsııasy retinde partııalyq fraktsııalarmen kelisimge otyrý týraly usynys jasamaqpyz. Osy oraıda ózara yntymaqtastyqta jumys isteý mańyzdy», - dedi Satybaldy Dáýletalın.





Aıta keteıik, Kásipodaqtar federatsııasyndaǵy kezdesýge Májilis depýtattary Erlan Saırov, Berik Bekjanov, Ekaterına Smyshlıaeva, Meırambek Tólepbergen qatysty.





Avtor Rýslan Ǵabbasov
Basty sózder: Qoǵam, Parlament, Zań,
Joǵary qaraı