QR Qarýly Kúshteri Arnaıy operatsııalar kúshteriniń qolbasshylyǵy quryldy

NUR-SULTAN. QazAqparat – Elimizde QR Qarýly Kúshteri Arnaıy operatsııalar kúshteriniń qolbasshylyǵy quryldy, dep habarlaıdy QazAqparat.

Prezıdent Qasym-Jomart Toqaev 2022 jyldyń 19 qańtary kúni «Qazaqstan Respýblıkasynyń Qarýly Kúshteri Arnaıy operatsııalar kúshteriniń qolbasshylyǵyn qurý týraly» Jarlyqqa qol qoıdy.

Jarlyq qol qoıylǵan kúnnen bastap kúshine enedi.

Jańa qurylym eldiń ulttyq qaýipsizdigi júıesi qyzmetin jetildirýdi qamtamasyz etedi.

Qujattyq tolyq mátini

* * *

QAZAQSTAN RESPÝBLIKASY PREZIDENTІNІŃ

JARLYǴY

Qazaqstan Respýblıkasynyń Qarýly Kúshteri Arnaıy operatsııalar kúshteriniń qolbasshylyǵyn qurý týraly

Qazaqstan Respýblıkasynyń ulttyq qaýipsizdigin qamtamasyz etý júıesin jetildirý maqsatynda QAÝLY ETEMІN:

1. Qazaqstan Respýblıkasynyń Qarýly Kúshteri Arnaıy operatsııalar kúshteriniń qolbasshylyǵy qurylsyn.

2. Qazaqstan Respýblıkasy Prezıdentiniń keıbir aktilerine engiziletin, qosa berilip otyrǵan ózgerister men tolyqtyrýlar bekitilsin.

3. Qazaqstan Respýblıkasynyń Úkimeti osy Jarlyqtan týyndaıtyn sharalardy qabyldasyn.

4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

5. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýbıkasynyń Prezıdenti

Q.Toqaev

Nur-Sultan, Aqorda, 2022 jylǵy 19 qańtar

№ 779