Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Kóshi-qondaǵy jekelegen fýnktsııalar Eńbek mınıstrliginiń qaramaǵyna berilmek

2021 jyldyń 24 qarasha 2021 11:47

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasyndaǵy kásipkerlik qyzmet salasynda jańa retteýshilik saıasatty engizý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.

Atalǵan zań jobasy 2021 jylǵy 3 qarashada birinshi oqylymda maquldandy.

Májilis depýtaty Syrym Ertaevtyń aıtýynsha, depýtattar zań jobasymen jumys barysynda memlekettik organdardyń kásipkerlik qyzmetti retteýdi júzege asyrý kezinde kásipkerlik sýbektiler úshin jaǵdaıdy jaqsartýǵa baǵyttalǵan birqatar túzetýler engizdi.

Olar:

- kásipkerlerge aqparattyq quraldardy elektrondyq nysanda ǵana emes, qaǵaz jetkizgishte de berý tásilin tańdaý quqyǵyn paıdalanýǵa múmkindik berýge;

- eger retteýshi memlekettik organ kásipkerlik sýbektileri úshin mindetti talaptar qamtylatyn normatıvtik quqyqtyq aktilerdiń, sondaı-aq ózge de qujattardyń tıimdiligin baǵalaý turǵysynan ýaqtyly taldaý júrgizbese, mindetti túrde olardyń kúshin joıýǵa nemese qaıta qaraýǵa;

- kásipkerlik qyzmetti retteý salasyndaǵy pılottyq jobany júrgizý sharttary zańnamalyq deńgeıde bekitilgen jaǵdaıda ǵana jáne oǵan jeke kásipkerlik sýbektileri erikti túrde qatysqan kezinde ǵana osy pılottyq jobany júrgizýdi kózdeıtin normalardy belgileýge;

- Kásipkerlerdiń quqyqtaryn qorǵaý jónindegi ýákildiń usynystary boıynsha kásipkerlik sýbektilerine qatysty retteýdi qatańdatatyn normalardyń kúshin joıý nemese qaıta qaraý úshin múmkindik berýge baǵyttalǵan.

«Budan basqa jumys tobynda depýtattar Іshki ister mınıstrliginen halyqtyń kóshi-qony salasyndaǵy jekelegen fýnktsııalar men ókilettikterdi Eńbek jáne halyqty áleýmettik qorǵaý mınıstrliginiń qaramaǵyna berýdi, sondaı-aq qylmystyq-atqarý júıesiniń mekemelerinde ustalatyn adamdardy medıtsınalyq qamtamasyz etýdi Densaýlyq saqtaý mınıstrliginiń qaramaǵyna berýdi kózdeıtin túzetýler engizdi», - dedi S. Ertaev.

«Astana» halyqaralyq qarjy ortalyǵy ınstıtýttaryn Qazaqstan Respýblıkasyna ınvestıtsııalar tartý úshin paıdalaný maqsatynda «Memlekettik múlik týraly» Zańǵa jekelegen túzetýler usynyldy.

Sonymen qatar, depýtattar zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizdi.

Buǵan qosa, zań jobasynyń taqyryby «Qazaqstan Respýblıkasynyń keıbir zańnamalyq aktilerine kásipkerlik qyzmet salasynda jańa retteýshilik saıasatty endirý jáne Qazaqstan Respýblıkasy ishki ister organdarynyń jekelegen fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» dep jańa redaktsııada jazyldy.


Joǵary qaraı