Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Kórshi memleketter elimizdegi qaıǵyly jaǵdaıǵa baılanysty kóńil aıtý jedelhatyn joldady

2022 jyldyń 12 qańtar 2022 20:45

NUR-SULTAN. QazAqparat - Qazaqstandaǵy qaıǵyly oqıǵalar kezinde kóptegen adamnyń qaza bolýyna baılanysty Qasym-Jomart Toqaevtyń atyna shet memleketterdiń basshylarynan, halyqaralyq qurylymdardyń ókilderinen kóńil aıtý jedelhattary kelip jatyr, dep habarlaıdy Aqorda.

QHR Tóraǵasy Sı Tszınpın jedelhatynda Qasym-Jomart Toqaevtyń memleket úshin sheshýshi sátte jaǵdaıdy jedel óz baqylaýyna alyp, batyl ári naqty sharalar qabyldaǵanyn jazǵan.

– Osydan Sizdiń saıasatker jáne elińiz ben halqyńyzdyń aldynda zor jaýapkershilik arqalaǵan tulǵa retindegi erligińiz kórinedi. Men muny joǵary baǵalaımyn! Qytaı tarapy Qazaqstannyń turaqtylyǵyna nuqsan keltiretin, onyń qaýipsizdigine qaýip tóndiretin, Qazaqstan halqynyń tynyshtyǵyn buzatyn kez kelgen kúshterge jáne Qazaqstanda sanaly túrde haos týǵyzyp, «túrli-tústi revolıýtsııa» jasaıtyn syrtqy kúshterge batyl qarsy shyǵady. Qazaqstan men Qytaı arasyndaǵy dostyqqa syna qaǵýǵa jáne ekijaqty yntymaqtastyqqa kedergi keltirýge tyrysatyn kez kelgen áreketke batyl qarsy turady, – delingen Qytaı Tóraǵasynyń jedelhatynda.

Ózbekstan Prezıdenti Shavkat Mırzıeev óziniń hatynda Qasym-JomartToqaevqa jáne Qazaqstan halqyna kóńil aıtyp, elimizdegi beıbitshilikti saqtaý jolynda qaza tapqan qaısar ulandardyń jaqyndary men týystarynyń qaıǵysyna ortaqtasatyn aıtqan.

– Baýyrlas Qazaqstanda beıbitshilik pen turaqtylyqty qamtamasyz etý jolyndaǵy Sizdiń batyl kúsh-jigerińizdi tolyq qoldaıtynymyzdy taǵy da naqtylaǵym keledi, – delingen Ózbekstan kóshbasshysynyń jedelhatynda.

Qyrǵyzstan Prezıdenti Sadyr Japarov joldaǵan jedelhatynda Qazaqstanda bolǵan qaıǵyly oqıǵalardy zor kúızelispen qabyldaǵanyn atap ótip, Qyrǵyzstan halqynyń jáne jeke óziniń atynan Memleket basshysy Qasym-Jomart Toqaevqa jáne qazaq halqyna kóńil aıtqan.

– Myzǵymas dostyq, tatý kórshilik jáne ózara syılastyqqa negizdelgen halyqtarymyzdyń kóp ǵasyrlyq ortaq tarıhı, rýhanı jáne mádenı baılanystaryn eskere otyryp, Qyrǵyzstan Qazaqstan Respýblıkasyn qashanda nıettes, senimdi kórshi ári strategııalyq áriptes retinde qoldaıdy, – delingen Qyrǵyzstan basshysynyń jedelhatynda.

Belarýs Prezıdenti Aleksandr Lýkashenko kóptegen adamnyń qurban bolýyna jáne ǵımarattardyń qıraýyna ákep soqtyrǵan sodyrlar tobynyń elimizge jasaǵan shabýyly halyqaralyq terrorızmniń álemge zor qaýip tóndiretinin taǵy da kórsetti dep jazǵan.

– Ekstremısterdiń túpki maqsaty – kópultty Qazaqstandaǵy jaǵdaıdy turaqsyzdandyrý, elde haos ornatyp, konstıtýtsııaǵa qarsy tóńkeris jasaý jáne saıası baǵdardy ózgertý úshin baýyrlar arasynda soǵys otyn órshitý ekeni aıqyn, – dep jazdy Belarýs basshysy.

Tájikstan Prezıdenti Emomalı Rahmon jáne Túrikmenstan Prezıdenti Gýrbangýly Berdimuhamedov, sondaı-aq BUU Órkenıetter Alıansynyń Joǵarǵy Ókili Mıgel Anhel Moratınos jáne basqa da tulǵalar qoldaý bildirip, kóńil aıtty.

Jedelhattar áli de kelip túsýde.


Joǵary qaraı